انسداددہشت گردی عدالت کراچی نے 9 مئی کے جلاؤ گھیراؤ کے مقدمے میں گرفتار پی ٹی آئی رہنما حلیم عادل شیخ اور راجہ اظہر کی ضمانت منظور کر لی۔
انسداد دہشتگردی عدالت کراچی میں تحریک انصاف کے رہنما حلیم عادل شیخ اور راجہ اظہر کی 9 مئی کے جلاؤ گھیراؤ کے مقدمے میں ضمانت کی درخواستوں پر سماعت کی۔
درخواست گزاروں نے درخواست میں مؤقف اپنایا کہ پولیس خود کہتی ہے سینکڑوں افراد احتجاج کر رہے تھے، پولیس کا کام تھا جلاؤگھیراؤ میں ملوث افراد کو تلاش کر کے گرفتار کرتی۔
وکیل نے مؤقف پیش کرتے ہوئے کہا کہ پراسیکیوشن اور تفتیشی افسر دونوں رہنماؤں کے خلاف الزامات ثابت کرنے میں ناکام رہے ہیں، دونوں رہنما رکن صوبائی اسمبلی رہے ہیں اور قانون پسند شہری ہیں۔
درخواست گزاروں نے عدالت سے استدعا کی تھانہ ٹیپو سلطان اور دیگر تھانوں میں درج مقدمات میں گرفتار بیشتر کارکنوں کی بھی ضمانت منظور ہو چکی ہے، ان کی بھی ضمانت منظور کی جائے۔
عدالت نے دونوں رہنماؤں کی 1 ،1 لاکھ روپے کے مچلکوں کے عوض ضمانت منظور کر لی ہے اور حکم دیا ہے کہ دونوں رہنما اگر کسی اور مقدمے میں پولیس کو مطلوب نہیں ہیں تو انہیں جیل سے رہا کیا جائے۔
