آصف علی زرداری سے درخواست ہے، ہمارے ہاتھ نہ باندھے جائیں، بلاول بھٹو

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ انتخابات کی تاریخ کا اعلان ہونے کے بعد پیپلز پارٹی سیاسی اتحاد بنانے پر غور کرے گی۔

واضح رہے کہ انتخابات میں چند ماہ باقی رہ گئے ہیں اور بلاول بھٹو گزشتہ کچھ عرصے سے پارٹی کی انتخابی تیاریوں کے حصے کے طور پر عوامی اجتماعات میں مصروف ہیں اور پارٹی اجلاسوں کا انعقاد کر رہے ہیں۔

پی ڈی ایم جماعتیں اپنے اپنے پلیٹ فارم پر مصروف عمل ہیں

بلاول بھٹو کا یہ بیان اس وقت سامنے آیا جب پیپلز پارٹی نے پاکستان تحریک انصاف (پی ٹی آئی) کے ساتھ انتخابی اتحاد کے امکان کو بھی مسترد کردیا جبکہ پاکستان ڈیموکریٹک موومنٹ (پی ڈی ایم) کی رکن جماعتیں بھی الگ نظر آ رہی ہیں۔

جب بلاول بھٹو سے پاکستان تحریک انصاف (پی ٹی آئی) کے ساتھ سیاسی مذاکرات کے بارے میں سوال کیا گیا تو انہوں نے کہا تھا کہ 9 مئی سے پہلے پیپلز پارٹی انتخابات کے لیے ہر سیاسی قوت سے بات چیت کرنے کی کوشش کر رہی تھی لیکن پی ٹی آئی نے لاہور کور کمانڈر ہاؤس، جی ایچ کیو اور دیگر فوجی تنصیبات پر حملے کیے۔

ان کا کہنا تھا کہ ہم ایسے لوگوں کے ساتھ بات چیت کر سکتے ہیں جو 9 مئی کے حملوں میں ملوث نہیں ہیں۔ غیر عسکریت پسند تنظیموں کے ساتھ مذاکرات کے لیے ہمارے دروازے کھلے ہیں۔

واضح رہے کہ اگرچہ اس کا باضابطہ اعلان نہیں کیا گیا ہے، لیکن ملک کا سب سے بڑا سیاسی اتحاد، پی ڈی ایم، غیر فعال نظر آتا ہے اور بڑا ووٹ بینک رکھنے والی سیاسی جماعتیں سوچتی ہیں کہ انہیں اب اس پلیٹ فارم کی ضرورت نہیں رہی ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں