گورنر سندھ کامران ٹیسوری نے کہاکہ جماعت اسلامی کا رویہ افسوسناک ہے، جب پارک کا افتتاح کرنے گئے تو جماعت اسلامی کے کارکنوں نے نازیبا اور غیر اخلاقی نعرے لگائے، اگر وہ چاہتے تو اپنے سیکٹر کے لوگوں کو بلا کر نعروں کا جواب دیتے۔
گورنر سندھ کامران ٹیسوری نے کہاکہ کراچی کی ترقی کے لیے تمام جماعتوں کو ساتھ لے کرچلنا چاہتے ہیں لیکن جماعت اسلامی والے نامناسب بیانات دے رہے ہیں، سب جانتے ہیں کہ گورنر ہاؤس عوامی ہے اور گورنر ہاؤس کے دروازے عوام کے لیے کھلے ہیں۔
مزید پڑھیں
گورنر سندھ کامران ٹیسوری نے میڈیا سے گفتگو کرتے ہوئے کہا کہ وہ نارتھ ناظم آباد میں ایک پارک کا افتتاح کرنے گئے تھے جہاں جماعت اسلامی کے کارکنان نے نامناسب نعرے بازی کی اور حافظ نعیم نے کال کرکے کہا کہ آپ افتتاح نہیں کریں گے۔
کامران ٹیسوری کا کہنا تھا کہ ’میں نے حافظ نعیم سے کہا ہے کہ ہم ساتھ ملکر پارک کا افتتاح کرتے ہیں بلکہ اپنا نام ہٹوا کر آپ کا نام لکھوا دیتے ہیں لیکن بعد میں پتا چلا کہ وہ رؤف صدیقی کا نام شامل کرنے پر ناراض تھے‘۔
گورنر سندھ نے کہا کہ پارک کا نام کسی ایک شخص کے نام سے منسوب ہونا کوئی مسئلہ نہیں ہے، حافظ نعیم نے دعوت کو ٹھکرا کرکہا کہ جب ہم کہیں گے تو آپ افتتاح کے لیے آئیں۔ انہوں نے میری بات پر ضد کا اظہار کرتے ہوئے انکار کردیا۔
انہوں نے کہا کہ جماعت اسلامی کو ایم کیو ایم کے بائیکاٹ کے باعث سیٹیں ملی تھیں، یہ کس بات پر اتنا واویلا مچا رہے ہیں، حافظ نعیم تو چائنہ کٹنگ کے ذریعے میئر بننا چاہتے تھے۔
