گورنر سندھ کامران ٹیسوری نے امیر کراچی جماعت اسلامی حافظ نعیم الرحمٰن کے ہمراہ پریس کانفرنس کرتے ہوئے کہاکہ سیاست میں اختلاف رائے ہوسکتا ہے مگر تلخی نہیں ہونی چاہیے، مجھے یقین تھا کہ لڑائی زیادہ طویل نہیں ہوگی، ہم نے مل کر آگے بڑھنا ہے۔
گورنر سندھ کامران ٹیسوری کی جماعت اسلامی کے مرکز ادارہ نور حق آمد ہوئی جہاں دونوں رہنماؤں نے ملاقات کے بعد پریس کانفرنس کی۔ میڈیا سے بات کرتے ہوئے امیر کراچی جماعت اسلامی حافظ نعیم الرحمٰن نے کہاکہ کچھ غلط فہمیاں تھیں دور ہو گئی ہیں۔ اختلاف تہذیب کے دائرے میں رہ کر ہونا چاہیے، گورنر سندھ کامران ٹیسوری پر کسی کو غصہ نہیں ہوسکتا اختلاف ضرور ہو سکتا ہے۔
انہوں نے کہاکہ جب گورنر سندھ پارک کے افتتاح کے لیے آئے تو لوگوں کو غلط تاثر گیا کہ شاید یہ لوگ قبضہ کرنے آئے ہیں، اس لیے لوگوں نے رد عمل دیا، لوگوں نے غصہ دکھایا جس کے اظہار کا انداز غلط تھا۔
مزید پڑھیں
گورنر سندھ کامران خان ٹیسور نے کہاکہ حافظ نعیم الرحمٰن سے بات ہو گئی ہے، جب بھی پارک کا کام مکمل ہو جائے گا تو پارک کا افتتاح کیا جائے گا جس میں حافظ نعیم الرحمٰن ان کے ہمراہ ہوں گے۔
کامران ٹیسوری نے کہاکہ کراچی کی ترقی کئی دہائیوں سے رکی ہوئی ہے، کراچی میں سمندر ہے مگر پینے کا پانی نہیں ہے، کراچی کی سڑکیں اور راستے لوگوں کے دلوں کی طرح ٹوٹے ہوئے ہیں۔ کراچی آج بھی باقی شہروں کے مقابلے میں بدتر حالت میں ہے۔
کراچی کے امیر جماعت اسلامی حافظ نعیم نے کہاکہ کراچی کی ڈیڑھ کروڑ آبادی کم گنتی ہوئی ہے، کراچی کی آبادی کم دکھانے سے سیٹیں کم ہوتی ہیں، ہم ہمیشہ سے یہی چاہتے ہیں کہ بلدیاتی نمائندوں کے اختیارات میں اضافہ ہو۔
