پاکستان مسلم لیگ (ن) کی سینئر نائب صدر اور مرکزی آرگنائزر مریم نواز نے پارٹی کے نئے نعرے کا اعلان کر دیا ہے۔ آج لاہور میں مسلم اسٹوڈنٹس فیڈریشن (ایم ایس ایف) کی تقریب سے خطاب کرتے ہوئے انہوں نے اعلان کیا کہ نواز شریف 21 اکتوبر کو وطن واپس آ رہے ہیں اور اس دن پاکستان مسلم لیگ (ن) کا ایک ہی نعرہ ہوگا ’امید سے یقین تک ،پاک سر زمین تک‘۔
مریم نواز نے کہا کہ 100 دن میں پارٹی قائد کی آواز نگر نگر پہنچ گئی ہے، اس سے زیادہ خوشی کی بات اور کیا ہو گی۔ مریم نواز کا کہنا تھا کہ آج آپ اٹیمی طاقت ہیں اور جب تک پاکستان ہے ایٹمی طاقت رہے گا، 2013ء میں جب نواز شریف کو حکومت ملی تو 20,20 گھنٹے لوڈ شیڈنگ تھی لیکن نواز شریف کی حکومت نے ملک سے لوڈ شیڈنگ کا بالکل خاتمہ کر دیا۔
مریم نواز نے مزید کہا کہ انہیں خوشی ہے کہ پشاور کے لوگوں کے پاس بھی میٹرو بس ہے۔ انہوں نے چیئرمین پاکستان تحریک انصاف عمران خان پر ان کا نام لیے بغیرتنقید کرتے ہوئے کہا کہ کوئی ایک منصوبہ دکھا دیں جو اس شخص نے شروع کیا ہو، پاکستان کے تمام منصوبے نواز شریف کے دیے ہوئے ہیں۔
مزید پڑھیں
انہوں نے کہا کہ نواز شریف کے 4 سالہ دور حکومت میں ڈالر 97 یا 98 روپے پر رہا، نواز شریف کو اقامہ کے کیس پر نکالا گیا اور نتیجتاً آج تک ملک ترقی نہیں کرسکا، مشرف دور میں نواز شریف کو جیل میں رکھا گیا تو کلثوم نواز نے باہر قدم رکھا۔
مریم نواز نے کہا کہ ان کے لیے بھی یہ راستہ آسان نہیں تھا، وہ پانچ پانچ ماہ ڈیتھ سیل میں گزرا کر آئی ہیں۔ انہوں نے نوجوان کارکنان کو مخاطب کرتے ہوئے کہا کہ وہ 200 کے قریب پیشیاں بھگت کے ان کے سامنے کھڑی ہیں، انہیں ان کے والد کے سامنے کوٹ لکھپت سے گرفتار کیا گیا۔ انہوں نے کہا کہ ہر وہ شخص جس نے نواز شریف کے خلاف سازش کی آج عوام میں نکلنے کے قابل نہیں۔
اس موقع پرانہوں نے راؤ سکندر حیات ، پرویز رشید ، مریم اورنگزیب، انوشے رحمان، بلال کیانی سمیت تمام رہنماؤں کا شکریہ ادا کیا۔ انہوں نے کہا کہ پاکستان بھر میں ایم ایس ایف کے عہدیداران کی فہرست میں شامل نوجوانوں کی تعداد حوصلہ افزاء ہے اور انہیں خوشی ہو رہی ہے کہ بچوں کی بہت بڑی تعداد یہاں جمع ہوئی ہے۔
