لاہور کی مقامی عدالت کے باہر وکلا نے پولیس کی موجودگی میں ہتکھڑی لگے 2 بھائیوں کو برہنہ کر دیا۔
مذکورہ واقعہ منگل کے روز لاہور کی ضلع کچہری میں پیش آیا جب تھانہ ساندہ کی پولیس کے سب انسپکٹر سہیل عزیراور دیگر پولیس اہکاروں نے 2بھائیوں کو اقدام قتل کے مقدمے میں عدالت میں پیش کیا۔
جیسے ہی جج نے سماعت ختم کی تو مخالف وکلا کمرہ عدالت میں داخل ہوئے اور ملزمان پر ٹوٹ پڑے۔ اس حوالےسے ایک ویڈیو بھی منظر عام پر آئی جس میں دیکھا جاسکتا ہے کہ دونوں بھائیوں کے ہاتھوں میں ہتھکڑیاں لگی ہوئی ہیں اور وکلا نے ان پر جوتوں لاتوں مکھوں کی بارش کر دی اور مارتے ہوئے دونوں ملزمان کوکمرہ عدالت سے باہر لے گئے۔
باہر نکلنے پر ایک مخالف وکیل نے آواز لگائی کہ ان کے کپڑے اتار کر انہیں برہنہ کردو یہ آواز سننے کی دیر تھی کہ وہاں موجود تمام مخالف وکلا نے دھاوا بول دیا اور دونوں بھائیوں کے کپڑے اتار کر انہیں گالیاں دیتے رہے اس ساری صورتحال میں پولیس موقع پر موجود رہی اور وکلا زیر حراست ملزمان کو مارتے پیٹتے رہے جب وکلا تھک گئے تو پولیس حرکت میں آئی اور بغیر کپڑوں کے زیر حراست ملزمان کو تھانہ ساندہ لے گئی اور اس واقع کی تفتیش ملزمان سے ہی کی جاتی رہی۔
ایک دن گزر جانے کے باوجود پولیس نے مقدمہ درج نہیں کیا
اس واقعے کے بعد پولیس دونوں بھائیوں کو برہنہ حالت میں ہی لے کر تھانہ ساندہ کی طرف روانہ ہوئی تھی۔ جب معاملہ سوشل میڈیا پر وائرل ہوا تو پولیس نے ملزمان کی طرف سے ایک دراخوست دائر کی جس میں کہا گیا کہ نامعلوم وکلا نے پولیس کے زیر حراست ملزمان پر تشدد کیا جس کی ویڈیو وائرل ہوگئی۔ وکلا نے زبردستی کرتے ہوئے ہتھکڑی لگے ہوئے دونوں بھائیوں کو تشدد کا نشانہ بنایا جن کو بعدازاں پولیس چھڑوا کر لے گئی۔
پولیس کا کہنا ہے کہ اس معاملے پر قانونی کارروائی کی جارہی ہے اور ویڈیو میں دیکھے جانے والے تمام وکلا کو گرفتار کیا جائے گا۔
