قومی احتساب بیورو نے نیب ترمیمی ایکٹ کالعدم قرار دیئے جانے کے بعد دوسری عدالتوں کو منقتل تمام نیب ریفرنسز احتساب عدالت میں واپس دائر کرنے کا فیصلہ کرلیا ہے۔
نیب کی جانب سے ریفرنسز کی فہرست کے حساب سے ریکارڈ احتساب عدالت میں پیش کیا جائے گا۔
احتساب عدالت ذرائع کے مطابق نیب کی جانب سے 80 سے زائد ریفرنسز کا ریکارڈ دوبارہ احتساب عدالت میں جمع کرایا جائے گا۔ سابق وزیر خزانہ اسحاق ڈار کے خلاف آمدن سے زائد اثاثہ جات کا داخل دفتر کیا گیا ریفرنس بھی دوبارہ کھولا جائے گا۔
سابق صدر آصف علی زرداری، سابق وزیر اعظم شاہد خاقان عباسی، سید یوسف رضا گیلانی، نواز شریف، وزیر اعلیٰ سندھ مراد علی شاہ، راجہ پرویز اشرف اور دیگر اہم سیاسی و کاروباری شخصیات کے خلاف نیب ریفرنسز دوبارہ بحال ہو جائیں گے۔
اس سے قبل یہ تمام ریفرنسز نیب ترمیمی ایکٹ کا شکار ہوکر یا تو دوسری عدالتوں کو منتقل کردیئے گئے تھے، یا خارج کردیئے گئے تھے۔