قومی کرکٹ ٹیم کے سابق کپتان شاہد آفریدی نے کرکٹ کے عالمی مقابلے کے دوران قومی ٹیم کو جارحانہ کھیل پیش کرنے کا مشورہ دے دیا۔
شاہد آفریدی نے کہا ہے کہ اس وقت پوری قوم بابر اعظم کو سپورٹ کر رہی ہے جو ایک تجربہ کار ٹیم کے ساتھ کھیل رہے ہیں، بابر اعظم یقینی بنائیں کہ پورے ورلڈ کپ میں ان کی باڈی لینگویج جارحانہ ہو۔
سابق کپتان نے کہاکہ میچ کے دوران سب سے اہم چیز دباؤ سے نمٹنا ہوتا ہے اس لیے بابر اعظم کو اس پر فوکس کرنا ہوگا۔
مزید پڑھیں
شاہد آفریدی نے کہاکہ قومی ٹیم کے موجودہ کھلاڑیوں نے بھارت میں کرکٹ نہیں کھیلی اس لیے انہیں کنڈیشنز سے ہم آہنگ ہونے میں وقت ضرور لگے گا۔
سابق چیف سلیکٹر نے بابر اعظم کو یہ مشورہ بھی دیا کہ بحیثیت کپتان کو آپ کو اپنے میچ ونر اور اہم کھلاڑیوں کے ساتھ قریبی تعلقات رکھنا ہوں گے، ان سے گراؤنڈ پلان پر بات کرنا ہوگی۔
بابر اعظم کو سینیئر کھلاڑیوں کو اعتماد دینا ہوگا
سابق کپتان نے کہاکہ بابراعظم ٹیم کے سینیئر کھلاڑیوں کے ساتھ وقت گزاریں، ان کے ساتھ ڈنر کریں، ایک ساتھ نماز پڑھیں اور سب کو اعتماد دیں۔
شاہد آفریدی نے پی سی بی کے اعلیٰ عہدیداران کو بھی مشورہ دیا کہ اس وقت کپتان بابر اعظم کو اعتماد دینے کی ضرورت ہے، ان کا کہنا تھا کہ مکی آرتھر اور انضمام الحق بھارت میں موجود ہیں جن کا کردار اہم ہو سکتا ہے۔
واضح رہے کہ کرکٹ کے عالمی مقابلے کا آغاز 5 اکتوبر سے بھارت میں ہونے جا رہا ہے، پاکستان اپنا پہلا میچ 6 اکتوبر کو نیدر لینڈ کے خلاف کھیلے گا، جبکہ پاکستان اور بھارت کے درمیان میچ 14 اکتوبر کو احمد آباد کے نریندر مودی اسٹیڈیم میں ہو گا۔