اسپین میں ایک نائٹ کلب میں آگ لگنے سے کم از کم 13 افراد ہلاک ہو گئے ہیں۔ حکام نے بتایا ہے کہ اس واقعے میں 4 افراد زخمی بھی ہوئے ہیں جن میں 2 خواتین اور 2 مرد شامل ہیں۔
غیر ملکی میڈیا کے مطابق آگ اتوار کی صبح 6 بجے مرسیا شہرمیں واقع دو منزلہ نائٹ کلب ’ ٹیٹر‘ میں لگی۔ اس کلب کو ’فونڈا میلاگروس‘ بھی کہا جاتا ہے۔ عمارت میں تاحال کئی افراد پھنسے ہوئے ہیں جس کے باعث حکام نے مزید ہلاکتوں کا خدشہ ظاہر کیا ہے۔
اسپین کی ایمرجنسی سروسز نے ایکس پر ایک پوسٹ میں کہا کہ فائرفائٹرز نے جائے وقوعہ پر تاحال کام جاری رکھا ہوا ہے اور انہوں نے آگ سے متاثرہ مزید افراد کے ملنے کے امکان کو مسترد نہیں کیا ۔
BREAKING 🚨 At least six dead in nightclub fire in southeastern Spain
— Insider Paper (@TheInsiderPaper) October 1, 2023
مرسیا کے میئر جوز بیلسٹا نے کہا ہے کہ نائٹ کلب میں آگ مقامی وقت کے مطابق صبح 6 بجے لگی تھی جس نے دیکھتے ہی دیکھتے پوری عمارت کو اپنی لپیٹ میں لے لیا۔ انہوں نے کہا کہ فائر فائٹرز صبح 7 بجے جائے وقوعہ پر روانہ ہوئے تھے اور صبح 8 بجے تک انہوں نے آگ پر قابو پالیا تھا۔
سالگرہ کی تقریب
ہسپانوی پولیس کے ترجمان ڈیاگو سیرل نے کہا ہے کہ کہ ہفتہ کی رات کلب میں سالگرہ کی تقریب کا انعقاد کیا جا رہا تھا، ابتدائی معلومات کے مطابق آگ نائٹ کلب کی پہلی منزل پر لگی۔ انہوں نے بتایا کہ آگ بجھانے کے لیے 40 سے زیادہ فائر فائٹرز اور 12 ایمرجنسی گاڑیاں جائے وقوعہ پر موجود تھیں۔
مزید پڑھیں
اسپین کے وزیراعظم پیڈرو سانچیز نے مرسیا نائٹ کلب میں ہونے والی المناک آتشزدگی کے متاثرین اور ان کے لواحقین کے ساتھ یکجہتی کا اظہار کیا ہے جبکہ مرسیا کے میئر نے شہر میں 3 روزہ سوگ کا اعلان کیا ہے۔
واضح رہے 2017ء میں اسپین کے ایک جزیرے ٹینیرائف پر ایک نائٹ کلب میں چھت گرنے سے 40 افراد زخمی ہو گئے تھے۔ اس سے قبل 1990ء میں اسپین کے ایک نائٹ کلب میں آتشزدگی کے باعث 43 افراد ہلاک ہوگئے تھے۔
