ترکیہ کی وزارت داخلہ کے مطابق دارالحکومت انقرہ میں جنرل ڈائریکٹوریٹ آف سیکیورٹی کی عمارت کے سامنے خود کش دھماکا ہوا، دھماکے کے نتیجے میں 2 پولیس اہلکار زخمی ہوگئے جبکہ 2 دہشتگرد ہلاک ہیں۔
وزیر داخلہ علی پرلیلکایا کے مطابق کار سوار 2 دہشتگردوں نے وزارت داخلہ کے دروازے سے گاڑی ٹکرائی جس کے نتیجے میں آگ لگی اور ایک دہشتگرد مارا گیا جبکہ دوسرے دہشتگرد نے خود کو دھماکے سے اڑا دیا۔ وہاں موجود پولیس اہلکاروں نے دہشتگرد کے پاس موجود دھماکہ خیز مواد قابو کرکے غیر مؤثر بنا دیا۔
#BREAKING: Two terrorists carry out attack in front of General Directorate of Security in Turkish capital of Ankara, one neutralised, other blows himself – Interior Minister Ali Yerlikaya pic.twitter.com/Jx45Y0ZJ0z
— TRT World (@trtworld) October 1, 2023
علی یرلیکایا نے کہا کہ اس حملے میں 2 پولیس اہلکار معمولی زخمی ہوئے ہیں، یہ واقعہ مقامی وقت کے مطابق صبح 9.30 بجے پیش آیا، اس کے علاوہ ترکیہ کے دارالحکومت انقرہ کے قلب میں ترک وزارت داخلہ کے سامنے بھی زوردار دھماکے کی آواز سنی گئی۔
ترکیہ کے نشریاتی ادارے ٹی آر ٹی کے مطابق دارالحکومت کے کنکایا ضلع کے بڑے شہر کے مرکز کزیلے میں وزارت کی عمارت کے قریب دھماکے اور گولیوں کی آوازیں سننے کے بعد پولیس فورسز نے علاقے میں سیکورٹی بڑھا دی۔
رپورٹ کے مطابق گرینڈ نیشنل اسمبلی کے ایک گیٹ کے قریب دھماکے کی وجہ سے مرکزی اتاترک بلیوارڈ کو ٹریفک کے لیے بند کر دیا گیا۔ اسپیشل آپریشنز پولیس بھی جائے وقوعہ پر روانہ کردی گئی۔ فائر بریگیڈ اور میڈیکل ٹیمیں بھی جائے وقوعہ پر موجود ہیں۔
انقرہ کے چیف پبلک پراسیکیوٹر کے دفتر نے دہشت گردانہ حملے کی تحقیقات کا آغاز کردیا ہے۔
دہشت گردانہ حملے کے بعد ترکیہ کی پارلیمنٹ کے اسپیکر نعمان قرطلمس نے کہا کہ ہم ایک بار پھر اس بات پر زور دیتے ہیں کہ ہم ہمیشہ اپنی بہادر سیکیورٹی فورسز اور اداروں کے ساتھ کھڑے ہیں کیونکہ وہ دہشت گردوں اور ان کے پیچھے موجود قوتوں کو ختم کرنے کے لیے پرعزم ہیں۔
وزیر خارجہ خاقان فیدان نے بھی حملے کی مذمت کرتے ہوئے کہاکہ اپنے پولیس افسروں کی جلد صحت یابی کے لیے دعا گو ہیں، ملک میں جاری دہشتگردوں کے خلاف اپنی جنگ جاری رکھیں گے۔
