نگران وزیراعظم انوارالحق کاکڑ نے کہا ہے کہ پولیو کا خاتمہ ہمارا دینی، اخلاقی اور قومی فریضہ ہے، اس موذی مرض سے ہمیں اپنی آنے والی نسلوں کو بچانا ہے، ملک کو پولیو سے پاک کرنے کے عزم کے ساتھ انسداد پولیو کی جنگ جیتیں گے، پولیو ورکرز ہمارےاصل ہیرو ہیں۔
اسلام آباد میں ملک گیر انسداد پولیو مہم کے آغاز کی تقریب سے خطاب کرتے ہوئے نگران وزیراعظم نے کہا کہ انہوں نے بچوں کو پولیو سے بچاؤ کے قطرے پلا کر 5 روزہ قومی انسداد پولیو مہم کا آغاز کردیا ہے۔ 5 سال تک کی عمر کے 4 کروڑ 40 لاکھ سے زائد بچوں کو انسداد پولیو کے قطرے پلائے جائیں گے۔ قومی مہم میں ساڑھے 3 لاکھ پولیو ورکرز حصہ لے رہے ہیں جو ہمارے اصل ہیرو ہیں اور فرنٹ لائن ورکرز ہیں۔
وزیراعظم انوارالحق کاکڑ کا کہنا تھا کہ حکومت پولیو وائرس کے خاتمہ کے لیے اپنے بین الاقوامی شراکت داروں مل کر جنگ لڑ رہی ہے اور اس موذی مرض سے ہمیں اپنی آنے والی نسلوں کو بچانا ہے۔ یہ ہم سب کا دینی، اخلاقی اور قومی فریضہ ہے۔
مزید پڑھیں
نگران وزیراعظم نے تمام مکاتب فکر کے علما سے اپیل کی کہ وہ آنے والی نسلوں کو اس مرض سے بچانے کی مہم میں بڑھ چڑھ کر حصہ لیں اور اللہ تعالیٰ اور اس کے رسولﷺکی خوشنودی اور اپنی آخرت سنوارنے کے لیے حکومت کی مدد کریں۔
انہوں نے کہا کہ مہم کو مشن سمجھ کر مکمل کرنا ہے جس سے اقوام عالم میں ایسی تصویر پیش ہو کہ جس میں اپنے بچوں کی حفاظت کے لیے بھرپور عزم کا اظہار ہو۔ اسی عزم کے ساتھ انسداد پولیو کی جنگ ہم ضرور جیتیں گے۔
