سابق وزیراعظم عمران خان کی اہلیہ بشری بی بی نے لطیف کھوسہ ایڈووکیٹ کے توسط سے اسلام آباد ہائیکورٹ میں دائر درخواست میں عمران خان کو جیل میں کھانے کے ذریعے زہر دیے جانے کے خدشہ کا اظہار کیا ہے۔
درخواست میں موقف اختیار کیا گیا ہے کہ چیئرمین پی ٹی آئی کو گھر کے کھانے کی اجازت نہیں دی گئی ہے، ماضی میں قیدیوں کو سہولت دی گئی تھی، ذمہ دار میڈیکل افسر کے ذریعے خالص خوراک کی فراہمی کو یقینی بنایا جائے، ملاوٹ شدہ خوراک شوہر کی زندگی کے لیے نقصان دہ ہو سکتی ہے۔
درخواست میں بشری بی بی نے موقف اپنایا ہے کہ ان کے گرفتار شوہر کو جیل مینوئل کے مطابق وہ سہولیات بھی فراہم نہیں کی جارہی ہیں، جس کے وہ حق دار ہیں۔ انہوں نے جیل میں سہولیات کی فراہمی سے متعلق عدالتی حکم پر عمل درآمد کرانے کی استدعا بھی کی ہے۔
درخواست کے مطابق بشری بی بی کا موقف ہے کہ ان کے شوہر کے ساتھ جیل میں غیر انسانی سلوک آئین کے آرٹیکل 9 اور14 کی خلاف ورزی ہے ۔ درخواست میں عدالت سے استدعا کی گئی ہے کہ چیئرمین پی ٹی آئی کو جیل میں واک اور ایکرسائز کی سہولت فراہم کی جائے۔
