پاکستان کرکٹ بورڈ (پی سی بی) کے چیئرمین ذکا اشرف نے کہا ہے کہ ورلڈ کپ میں کھلاڑیوں کی کارکردگی دیکھ کر بڑے اور مشکل فیصلے کیے جائیں گے، سینٹرل کنٹریکٹ کے وقت قومی کرکٹ ٹیم کے کپتان نے ہمیں یقین دہانی کرائی ہے کہ اب کھلاڑی اپنے کھیل پر مکمل توجہ دیں گے، لیگز کو ترجیح نہیں دی جائے گی۔
نجی ٹی وی کے پروگرام میں گفتگو کرتے ہوئے ذکا اشرف نے کہاکہ نسیم شاہ کے علاوہ ہماری وہی پرانی ٹیم ورلڈ کپ کھیلنے کے لیے گئی ہے، پوری قوم کی دعائیں شاہینوں کے ساتھ ہیں کہ وہ ورلڈ کپ جیت کر واپس آئیں۔
مزید پڑھیں
انہوں نے کہاکہ کہ بھارت میں کرکٹ ورلڈ کپ دیکھنے لیے جانے کی خواہش رکھنے والے کرکٹ فینز اور صحافیوں کو ویزے ملنے چاہییں، اس حوالے سے ہم نے آئی سی سی کو خط لکھا ہے، اس کے علاوہ بی سی سی آئی سے بھی بات کر رہے ہیں۔
بھارت کو دشمن ملک کہنے سے متعلق سوال کا جواب دیتے ہوئے ذکا اشرف نے کہاکہ میری زبان پھسل گئی تھی، میں ایسی بات بالکل بھی نہیں کہنا چاہتا تھا۔
چیئرمین پی سی بی نے کہاکہ کرکٹ تو ایک دوستی اور محبت کا پیغام ہے، میری بات سے اگر کسی کی دل آزاری ہوئی ہے تو وہ اس کو کلیئر کر لے کہ میں بالکل بھی ایسا نہیں کہنا چاہتا تھا، بس زبان پھسل گئی۔
اب کھلاڑیوں کو صرف 2 لیگز کھیلنے کی اجازت ہو گی
ذکا اشرف نے کہاکہ ایشیا کپ میں ناقص کارکردگی کے بعد بلائی گئی میٹنگ میں بحث کے بعد نتیجہ یہ نکلا کہ ہمارے کھلاڑی لیگز کھیل کر تھک چکے تھے اور جب انٹرنیشنل سطح پر کھیلنے کا وقت آیا تو انجرڈ ہو گئے۔
ایک سوال کے جواب میں انہوں نے کہاکہ انضمام الحق کو چیف سلیکٹر اس لیے بنایا کہ ان کا ایک تجربہ ہے، ہم چاہتے ہیں کہ ہماری ٹیم کی کارکردگی بہتر ہو۔
ذکا اشرف نے کہاکہ میں جب بورڈ میں آیا تو موقف اختیار کیا کہ کھلاڑیوں کو اتنی زیادہ لیگز کھیلنے کی اجازت نہیں ہونی چاہیے، مگر اس سے پہلے کھلاڑیوں کو این او سیز جاری ہو چکے تھے جس کے باعث ہمارے لیے روکنا ممکن نہیں تھا۔
انہوں نے کہاکہ اب کھلاڑیوں کو پی ایس ایل کے ساتھ صرف 2 لیگز کھیلنے کی اجازت ہو گی اور یہ چیز سینٹرل کنٹریکٹ میں طے ہو چکی ہے۔
