نگراں وفاقی کابینہ نے لیفٹیننٹ جنرل منیر افسر کو چیئرمین نادرا تعینات کرنے کی منظوری دے دی

نگراں وفاقی کابینہ کا اجلاس اسلام آباد میں نگراں وزیر اعظم انوارالحق کاکڑ کی زیرِ صدارت ہوا جس میں مختلف معاہدوں اور منصوبوں کی منظوری دی گئی۔

پیر کو ہونے والے نگراں وفاقی کابینہ کے اجلاس کے بعد جاری ہونے والے اعلامیے میں بتایا گیا ہے کہ نگراں وفاقی کابینہ نے وفاقی وزارتِ تعلیم و فنی تربیت کی سفارش پر تکامل اور نیشنل ووکیشنل اینڈ ٹیکنکل ٹریننگ کمیشن کے مابین سروس لیول کے ترمیمی معاہدے کی منظوری دے دی ہے۔

افراد ی قوت ہمارا سرمایہ ، انہیں عصری تقاضوں سے ہم آہنگ کیا جائے، نگراں وزیر اعظم

اجلاس کے شرکاء سے گفتگو کرتے ہوئے وزیراعظم نے کہا کہ پیشہ وارانہ تعلیم اور فنی تربیت کے پروگرامز کو بین الاقوامی مارکیٹ کی ضروریات سے ہم آہنگ کرنے کی ضرورت ہے.

انہوں نے مزید کہا کہ ہنر مند افراد کی بیرون ملک روزگار مواقع بڑھانے کے حوالے سے اقدامات اٹھاے جائیں کیوں کہ افرادی قوت ہمارا سرمایہ ہے, افرادی قوت کو عصری تقاضوں کے مطابق ہنر کی فراہمی کے حوالے سے ہنگامی بنیادوں پر کام کیا جائے۔

انہوں نے نگراں وفاقی کابینہ کو ہدایت کی کہ فنی تعلیم اور پیشہ وارانہ تربیت کے موجودہ تمام مراکز کو فعال کیا جائے۔

وفاقی کابینہ نے اقتصادی رابطہ کمیٹی کی 6 ستمبر 2023 َاور 19 ستمبر 2023 کے اجلاسوں میں لیے گئے فیصلوں کی بھی توثیق کی ہے۔