پاکستان تحریک انصاف نے چیئرمین نیب کے استعفیٰ کا خیر مقدم کیا ہے۔ مرکزی سینئر نائب صدر نے ٹوئٹر اپنے پیغام میں کہا کہ چیئرمین نیب کا استعفیٰ فاشسٹ نظام کے ٹوٹنے کی طرف بڑا قدم ہے۔ آفتاب سلطان نے اپنے کام میں“مداخلت”کے خلاف استعفیٰ دیا۔
فواد چودھری کا مزید کہنا تھا چیف الیکشن کمشنر کے لیے چیئرمین نیب کے استعفیٰ میں بڑا پیغام ہے۔ میں ان 22 افسران کو جن کو پنجاب میں مداخلت کرنے کے لیے لگایا گیا ہے۔ کہتا ہوں وہ بھی خود کو اس نظام سے علیحدہ کریں۔
چیئرمین احتساب بیورو کااستعفیٰ فاشسٹ نظام کے ٹوٹنے کی طرف بڑا قدم ہے،آفتاب سلطان نے ان کے کام میں“مداخلت”کے خلاف استعفیٰ دیا میں ان 22افسران کو جن کو پنجاب میں مداخلت کرنے کیلئے لگایا گیا ہے کہتا ہوں وہ بھی خود کو اس نظام سے علیحدہ کریں یہ ملک اور بیوروکریسی دونوں کے مفاد میں ہے
— Ch Fawad Hussain (@fawadchaudhry) February 21, 2023
پاکستان تحریک انصاف سے جاری اعلامیے میں کہا گیا ہے کہ فواد چودھری نے کہا ہے یہ ملک اور بیوروکریسی دونوں کے مفاد میں ہے۔ چیئرمین نیب کا استعفیٰ تحریک انصاف کے مؤقف کی واضح توثیق ہے۔
اعلامیہ میں مزید کہا گیا ہے کہ روزِ اول سے کہہ رہے ہیں کہ نظامِ احتساب کی تباہی این آر او دیکر لائے گئے مجرموں کا کلیدی ہدف ہے۔ان مجرموں نے سازش سے اقتدار ملتے ہی سب سے پہلے نیب کو تباہ کیا۔ اپنے 11 سو ارب کی چوری بچانے کے لیے انہوں نے نیب قانون میں نہایت شرمناک ترامیم کیں۔
ان کا کہنا تھا لازم ہے کہ ریاستی ادارے مجرموں کے اشاروں پر کھیلنے کی بجائے آئین و قانون کی بالادستی کی راہ اختیار کریں۔کٹھ پتلی راج ان شاءاللہ جلد انجام کو پہنچے گا۔ ریاست اور عوام کو آگے بڑھنا ہے۔
