ایک روزہ کرکٹ میں بابر اعظم کی حکمرانی برقرار

انٹرنیشنل کرکٹ کونسل (آئی سی سی) نے ایک روزہ کرکٹ میں پلیئرز کی رینکنگ جاری کر دی ہے، جس کے مطابق بیٹرز میں قومی کرکٹ ٹیم کے کپتان بابر اعظم بدستور پہلے نمبر پر براجمان ہیں۔

آئی سی سی کی جانب سے جاری رینکنگ کے مطابق قومی کپتان بابر اعظم 857 پوائنٹس کے ساتھ پہلے نمبر پر ہیں، جبکہ دوسرے نمبر پر بھارتی بیٹر شمبن گل موجود ہیں جن کے پوائنٹس 839 ہیں۔

قومی ٹیم کے اوپننگ بیٹر امام الحق کی ایک درجہ تنزلی ہوئی ہے اور وہ پانچویں سے چھٹے نمبر پر چلے گئے ہیں جبکہ ان کی جگہ آسٹریلوی بیٹر ڈیوڈ وارنر نے لے لی ہے۔

بھارتی کپتان روہت شرما ایک درجہ ترقی پا کر 10ویں نمبر پر براجمان ہو گئے ہیں، اس کے علاوہ فخر زمان ایک درجہ تنزلی کے بعد 10 ویں سے 11ویں نمبر پر چلے گئے ہیں۔

آئی سی سی رینکنگ کے مطابق آسٹریلیا کے آسٹیو اسمتھ نے 3 درجے ترقی پا کر 13ویں نمبر پر قبضہ جما لیا ہے۔

دوسری جانب بولرز کی رینکنگ میں بھارت کے اسٹار بولر محمد سراج نے اپنی بادشاہت برقرار رکھی ہوئی ہے، اس کے علاوہ قومی کرکٹ ٹیم کے فاسٹ بولر شاہین شاہ آفریدی نے 2 درجے ترقی پائی ہے اور چھٹے نمبر پر آ گئے ہیں۔

آسٹریلوی بولر میچل اسٹارک کی 2 درجے تنزلی ہوئی ہے اور وہ رینکنگ میں آٹھویں نمبر پر چلے گئے ہیں۔

افغانستان کے محمد نبی ایک درجہ ترقی پا کر دسویں نمبر پر آ گئے ہیں۔

بولرز کی رینکنگ میں حارث رؤف کا نمبر 21واں ہے، اس کے علاوہ آل راؤنڈرز میں بنگلا دیش کے شکیب الحسن بدستور پہلے نمبر پر براجمان ہیں۔

بابر اعظم کو یہ اعزاز حاصل ہے کہ وہ نمبر ون بیٹر کی حیثیت سے کرکٹ ورلڈ کپ میں اپنے سفر کا آغاز کریں گے۔

ورلڈ کپ میں پاکستان کا پہلا میچ 6 اکتوبر کو نیدر لینڈ کے خلاف ہو گا، جبکہ روایتی حریف پاکستان اور بھارت 14 اکتوبر کو احمد آباد کے نریندرمودی کرکٹ اسٹیڈیم میں آمنے سامنے ہوں گے۔