پاکستان مسلم لیگ (ن) کی سینئر نائب صدر اور چیف آرگنائزر مریم نواز شریف نے اسرائیلی قابض فوج کے غزہ پر حملوں کی مذمت کرتے ہوئے اسلامی ممالک سے مطالبہ کیا ہے کہ وہ فلسطینیوں کو خوراک اور امدادی اشیاء کی فراہمی کے لیے اپنا کردار ادا کریں۔
اپنے ایک بیان میں انہوں نے کہا کہ ظالم و غاصب کے خلاف مظلوم کا ساتھ دینا ہی انصاف ہے، عالمی ادارے بھی تنازعہ کے پرامن اور منصفانہ حل کے لیے عملی کردار ادا کریں، انسانی جانوں کے مزید نقصان سے بچنے کے لیے فوری اقدامات کیے جائیں، عالمی قوانین اور سلامتی کونسل کی قراردادوں پر عملدرآمد سے ہی مشرق وسطیٰ میں پائیدار امن قائم ہو سکتا ہے۔
مزید پڑھیں
مریم نواز نے مزید کہا کہ عالمی قوانین، سلامتی کونسل کی قراردادوں اور دو ریاستی حل کے سمجھوتوں کی دھجیاں اڑانے والی غاصب فوج موجودہ حالات کی ذمہ دار ہے اور اس غاصب فوج کے خلاف اپنی آزادی کے لیے لڑنا فلسطینیوں کا حق ہے۔
مریم نواز نے بھارت کے غیر قانونی زیر قبضہ جموں و کشمیر اور مقبوضہ فلسطین کے مسلمانوں سے اظہار یکجہتی کرتے ہوئے کہا کہ مقبوضہ جموں و کشمیر میں بھارت اور مقبوضہ فلسطینی علاقوں میں اسرائیل نسل کشی اور ریاستی دہشت گردی کے جرم کا ارتکاب کر رہا ہے۔
مریم نواز نے کہا کہ پوری امت مسلمہ کی دعا ہے کہ مقبوضہ جموں و کشمیر اور فلسطین غاصبانہ قبضے سے آزاد ہوں، بہادر کشمیریوں اور فلسطینیوں کی قربانیوں سے آزادی کا سورج طلوع ہو کر رہے گا۔ مریم نواز نے فلسطینی شہداء کے درجات کی بلندی اور زخمیوں کی صحت یابی کی بھی دعا کی۔
