الیکشن کمیشن نے چیئرمین پی ٹی آئی عمران خان کو عہدے سے ہٹانے کی درخواست پر فیصلہ محفوظ کرلیا

الیکشن کمیشن نے چیئرمین پی ٹی آئی عمران خان کو عہدے سے ہٹانے کی درخواست پر فیصلہ محفوظ کر لیا ہے۔ چیئرمین پی ٹی آئی کو عہدے سے ہٹانے کی درخواست پر سماعت میں درخواست گزار نے مؤقف اپنایا کہ عمران خان کو توشہ خانہ کیس میں سزا ہو چکی ہے، اس حوالے سے نواز شریف کیس میں سپریم کورٹ کا حکم موجود ہے۔

وکیل کے مؤقف پر الیکشن کمیشن نے پوچھا کہ اگر ہائیکورٹ میں عمران خان کی اپیل منظور ہو جاتی ہے تو کیا ہوگا۔ وکیل نے بتایا کہ اگر اپیل منظور ہو جاتی ہے تو عمران خان عہدے پر واپس آجائیں گے۔ چیف الیکشن کمشنر نے نواز شریف اور چیئرمین پی ٹی آئی کیس میں فرق پوچھا تو وکیل نے کہا کہ نواز شریف کو سپریم کورٹ نے نا اہل کیا تھا جبکہ عمران خان کے خلاف الیکشن کمیشن نے اور ٹرائل کورٹ نے فیصلہ دیا ہے۔

بعد ازاں الیکشن کمیشن نے درخواست قابل سماعت یا ناقابل سماعت ہونے پر فیصلہ محفوظ کرلیا۔

یاد رہے کہ رواں ماہ 3 اکتوبر کو پاکستان تحریکِ انصاف (پی ٹی آئی) کے چیئرمین عمران خان کو عہدے سے ہٹانے کے لیے الیکشن کمیشن میں درخواست دائر کی گئی تھی۔

درخواست گزار خالد محمود خان نے اپنی درخواست میں کہا تھا کہ چیئرمین پی ٹی آئی عمران خان کا نام الیکشن کمیشن کے ریکارڈ سے بطور سربراہ پی ٹی آئی ہٹایا جائے۔