اسلام آباد میں آؤٹ اسکول چیلڈرن ایشوز اینڈ چیلنجز کے موضوع پر خطاب کرتے ہوئے صدر مملکت عارف علوی نے کہا کہ پاکستان کے بہتر اور خوشحال مستقبل کے لیے ملک میں تعلیم کے فروغ کے لیے قومی ایمرجنسی لگانے کی ضرورت ہے۔
ڈاکٹر عارف علوی کا کہنا تھا ملک کی خوشحالی کے لیے تعلیم کے حصول پر زور دیں اور اپنی ترجیحات کا تعین کریں۔
صدر مملکت نے کہا کہ ہمیں آگے بڑھنے کے لیے اپنی ترجیحات کو درست سیمت میں لانے کی ضرورت ہے اور تعلیم کے حصول کو درپیش مسائل کا حل تلاش کرنا چاہیے۔
صدر مملکت نے افسوس کا اظہار کرتے ہوئے کہا کہ پاکستان معیاری تعلیم فراہم کرنے میں بہت پیچھے ہے۔ انہوں نے مزید کہا کہ جو ممالک ترقی کرتے ہیں ان کی توجہ خواتین کو بااختیار بنانے اور تعلیم کے فروغ پر مرکوز ہوتی ہے۔
صدر مملکت نے کہا کہ پاکستان کو بیشتر مسائل کا سامنا ہے۔ ملک کو ان مسائل سے نکالنے کے لیے معاشرے کے ہر طبقے کو مل کر کوششیں کرنے کی ضرورت ہے۔
