پاکستان اور چین نے پٹرولیم کے شعبے میں 1 ارب 50 کروڑ ڈالر کی سرمایہ کاری سے متعلق مفاہمت کی یادداشت پر دستخط کر دیے ہیں۔ دستخطوں کی تقریب میں نگراں وزیراعظم انوار الحق کاکڑ اور نگراں وفاقی وزیر توانائی محمد علی بھی موجود تھے۔
چین کے یونائیٹڈ انرجی گروپ اور پاکستان ریفائنری لمیٹڈ کے درمیان مفاہمت کی یادداشت پر دستخط کیے گئے ہیں۔ سرمایہ کاری کے نتیجے میں ریفائنری سے حاصل ہونے والا پٹرول اور ہائی سپیڈ ڈیزل نہ صرف مہنگے درآمدی ایندھن کا متبادل ہوگا بلکہ ریفائنری کی پٹرول کی کل پیداواری استعداد اڑھائی لاکھ میٹرک ٹن سے بڑھ کر 16 لاکھ میڑک ٹن اور ہائی اسپیڈ ڈیزل کی پیداوار 6 لاکھ میٹرک ٹن سے بڑھ کر 20 لاکھ میٹرک ٹن ہو جائے گی۔
مزید پڑھیں
واضح رہے کہ وزیراعظم پاکستان انوارالحق کاکڑ ان دنوں تیسرے بیلٹ اینڈ روڈ فورم میں شرکت کے لیے چین کے دورے پر ہیں۔ وزیراعظم نے اس دورے کے دوران چین کے صدر لی شی پنگ اور روس کے صدر ولادیمیر پیوٹن سمیت متعدد عالمی رہنماؤں سے ملاقاتیں کی ہیں۔
