پشاور پولیس نے تصدیق کی ہے کہ ایڈورز کالج کے طالبعلم حسن طارق کے قتل میں گرفتار افغان شہری اپنے ہی ساتھیوں کی مبینہ فائرنگ سے ہلاک ہو گیا ہے۔ واقعہ گزشتہ رات تھانہ رحمان بابا کی حدود میں پیش آیا جب پولیس گرفتار ملزم کو ساتھ لیکر دیگر ملزمان کی تلاش میں گئی تھی، جہاں ان پر مسلحہ افراد نے فائرنگ کر دی تھی۔
پولیس گرفتار ملزم کو ساتھ لے کر کیوں گئی؟
ایس ایس پی آپریشن پشاور کاشف آفتاب عباسی نے بتایا کہ تھانہ رحمان بابا پولیس نے ایڈورڈز کالج کے طالب علم قتل کیس میں زیر حراست ملزم شاہسوار کی نشاہدہی پر دیگر ملزمان کی گرفتاری کے لیے چھاپہ مارا۔ اس دوران ملزمان نے پولیس پر فائرنگ کر دی جس کے نتیجے میں ملزم شاہسوار اپنے ساتھی ملزمان کی فائرنگ کی زد میں آگیا اور موقع پر ہی جان بحق ہوگیا۔ پولیس کی جوابی فائرنگ سے ملزمان فرار ہو گئے۔ شاہسوار کی لاش اسپتال منتقل کرکے مزید تفتیش شروع کر دی گئی ہے۔
مزید پڑھیں
کاشف عباسی نے مزید بتایا کہ کراس فائرنگ کے دوران ایک پولیس اہلکار کو بھی 2 گولیاں لگیں لیکن بلٹ پروف جیکٹ پہننے کی وجہ سے خوش قسمتی سے محفوظ رہا جبکہ مقابلہ کے دوران پولیس گاڑی کو بھی متعدد گولیاں لگیں۔ ملزمان رات کی تاریکی اور گنجان آباد علاقے کا فائدہ اٹھاتے ہوئے فرار ہوگئے۔ ملزمان کی گرفتاری کے لیے کارروائی جاری ہے۔
ایڈورڈ کالج کے طالب علم حسن طارق کا قتل
واقعہ 11 اکتوبر کو پیش آیا تھا ۔ جب پشاور کے ہائی سیکیورٹی زون جیل روڈ پر خیبر پختونخوا اسمبلی کے قریب کالج سے واپسی پر راہزنی کے دوران مزاحمت پر راہزنوں نے طالب علم کو گولی مار کر قتل کر دیا تھا۔ پشاور پولیس نے طالب علم کی شناخت حسن طارق کے نام سے کی تھی جو پشاور کے مشہور اور تاریخی ایڈورز کالج کا طالب علم تھا۔
پشاور پولیس کے مطابق حسن طارق ولد طارق خان رکشے میں کالج سے واپس گھر جا رہا تھا کہ اس دوران 2 موٹر سائیکل سوار ملزمان نے موبائل چھینے کی کوشش کی اور مزاحمت پر فائرنگ کر دی جس سے طالب علم جاں بحق ہو گیا۔
راہزن افغان اور غیرقانونی طور پر مقیم تھے
فائرنگ کے بعد پولیس نے طالب علم حسان طارق کے قتل میں ملوث ایک ملزم کو گرفتار کرنے کا دعویٰ کیا تھا۔ پولیس نے بتایا تھا کہ گرفتار ملزم افغان شہری ہے جو گزشتہ ایک سال سے پاکستان میں غیر قانونی مقیم اور راہزنی میں ملوث تھا۔ پولیس کے مطابق ملزم کا دوسرا ساتھی بھی افغان ہے۔
