پاکستان سمیت دنیا بھر میں انسداد پولیو کا عالمی دن آج منایا جارہا ہے۔ یہ دن پولیو کے دنیا بھر سے خاتمے کے لیے عالمی کوششوں کو اجاگر کرتا ہے۔ اس دن کو منانے کا مقصد اس مہلک بیماری سے ہر بچے کو بچانے کے لیے پولیو ویکسی نیشن کی اہمیت کے حوالے سے آگاہی پیدا کرنا ہے۔
پاکستان میں یہ دن خصوصی طور پر ان پولیو ورکرز کی انتھک کوششوں کو خراج تحسین پیش کرنے کے لیے منایا جا رہا ہے جو پولیو مہم کے دوران ملک کے کونے کونے میں جاکر خدمات سر انجام دیتے ہیں۔
عالمی ادارہ صحت کی رپورٹ کے مطابق اس وقت پولیو کا مرض دنیا میں صرف 2 ممالک پاکستان اور افغانستان میں موجود ہے ۔دنیا بھر میں پولیو کے کیسز میں 99.9 فیصد کمی آچکی ہے۔
مزید پڑھیں
پاکستان میں پولیو کیسز کی تعداد صرف 2 رہ چکی ہے۔ دونوں کیسز ضلع بنوں میں رواں سال مارچ 2023 اور اگست 2023 میں سامنے آئے تھے۔ افغانستان میں بھی ابتک رواں سال 5 پولیو کیسز سامنے آ چکے ہیں اور دونوں ممالک میں ایک ہی قسم کے وائرس رپورٹ ہوئے ہیں۔
عالمی ادارہ صحت کا کہنا ہے کہ پولیو اپاہج کر دینے والی مہلک متعدی بیماری ہے، اس بیماری میں مہلک پولیو وائرس عام طور پر 5 سال سے کم عمر کے بچوں کو متاثر کرتا ہے۔ اس بیماری کا کوئی علاج نہیں لیکن کم عمری میں محفوظ اور مؤثر ویکسین کے ذریعے اس بیماری میں مبتلا ہونے سے بچا جاسکتا ہے۔
