پاکستان کرکٹ ٹیم سابق ہیڈ کوچ ثقلین مشتاق نے افغانستان سے شکست کے بعد قومی ٹیم کو پیغام دیتے ہوئے کہا کہ پاکستان کی عزت کیلئے آپکو کم بیک کرنا ہوگا، ہمیں آپ پر یقین ہے، ہمارا ایمان بھی یہی ہے کہ یقین کے اوپر معجزے ہوتے ہیں۔
ایکس پر جاری کردہ ویڈیو بیان میں انہوں نے کہا کہ ‘ہم جانتے ہیں کہ آپ سب افغانستان سے شکست کے بعد افسردہ اور دل شکستہ ہونگے۔’
ثقلین مشتاق کا کہنا تھا کہ ‘جی جان کی بازی لگادو، انشا اللہ تم لوگ نتیجہ تبدیل کرو گے۔ تم لوگوں کو بہت رگڑیں لگی ہیں زندگی میں، کہاں سے شروع کیا تھا کہاں تک پہنچ گئے۔ تم لوگوں نے خود ہی سیکھا ہے، اپنے راستے اپنی منزل خود ہی ڈھونڈی ہے۔
ان کا مزید کہنا تھا کہ اپنے پہ، ایک دوسرے پہ اور اللہ پر یقین رکھو۔ تم سے زیادہ بہادر کوئی نہیں کیونکہ تم حالات سے لڑ کر آئے ہو۔ تم سے بڑا فائٹر کوئی نہیں کیونکہ تم سسٹم سے لڑ کر آئے ہو۔’
— Saqlain Mushtaq (@Saqlain_Mushtaq) October 23, 2023
سابق ہیڈ کوچ نے ٹیم کا حوصلہ بڑھاتے ہوئے کہا کہ ‘تم لوگوں نے غربت سے لڑا ہے، بہت سے ایسے لڑکوں کے میں جانتا ہوں جن کے پاس پہننے کو جوتے بھی نہیں تھے۔ ہم ورلڈکپ کے اندر ہیں، سیمی فائنل بھی کھیلیں گے، فائنل بھی کھیلیں گے۔
پاکستان کے بقیہ اگلے 4 میچز میں پہلا میچ 26 اکتوبرکو جنوبی افریقا، 31 اکتوبر کو بنگلادیش، 4 نومبر کو نیوزی لینڈ اور 11 نومبر کو انگلینڈ سے ہوگا، سیمی فائنل تک رسائی کیلئے پاکستان کو یہ چاروں میچز لازمی جیتنے ہوں گے، جس کے بعد گروپ اسٹیج پر پاکستان کے پوائنٹس 12 ہوں گے۔ اس وقت قومی ٹیم کے 04 پوائنٹس ہیں۔
