محکمہ صحت سندھ نے کراچی میں بڑھتے فلو وائرس پر ایڈوائزری جاری کردی

محکمہ صحت سندھ نے کراچی میں بڑھتے ہوئے فلو وائرس پر ایڈوائزری جاری کی ہے اور عوام سے اپیل کی ہے کہ وہ کھانستے اور چھینکتے وقت ناک اور منہ کوڈھانپ لیں۔

صوبائی محکمہ صحت کی جانب سے یہ اپیل کراچی میں تیزی سے بڑھتے ہوئے انولوئنزا وائرس کے پیش نظر کی گئی ہے۔

محکمہ صحت کی جانب سے جاری ہدایات میں کہا گیا ہے کہ نئے انفلوئنزا وائرس سے لوگ نزلہ، کھانسی اور بخار میں مبتلا ہورہے ہیں، وائرس سے حاملہ خواتین، بچے اور 65 برس سے زائد عمر کے افراد زیادہ متاثرہوسکتےہیں۔

محکمہ صحت نے اسپتالوں کو داخل کیے گئے متاثرہ مریضوں کو آئسولیشن میں رکھنے کی ہدایت کی ہے اور شہریوں سے کہا ہے کہ وہ اپنے ہاتھوں کو اینٹی بیکٹیریل صابن یا ہینڈواش سے اچھی طرح دھوئیں، آنکھ، ناک اور منہ کو نہ چھوئیں اور غذائیت سے بھرپور خوراک استعمال کریں۔

محکمہ صحت نے شہریوں کو ہدایت کی ہے کہ وہ بند جگہوں پر وینٹی لیشن کے نظام کو بہتر رکھیں، مناسب نیند لیں اور جسمانی طور پر چاق چوبند رہیں، فلو کےشکار افراد بخار اترنے تک کم سے کم 24 گھنٹے گھر میں رہیں۔