بھارت کی سوشل میڈیا اسٹار عرفی جاوید نے دعویٰ کیا ہے کہ معروف اداکار راج پال یادیو کے مشہور کردار ’چھوٹا پنڈت‘ کی نقل کرنے پر انہیں ریپ کی دھمکیاں مل رہی ہیں۔
عرفی جاوید نے انسٹاگرام پوسٹ میں لکھا کہ 2007 میں اکشے کمار کی ریلیز ہونے والی فلم ’بھول بھلیاں‘ میں راج پال یادیو کے مشہور کردار ’چھوٹا پنڈت‘ کی نقل کرنے پر انہیں دھمکیاں موصول ہوئی ہیں۔
عرفی جاوید نے انسٹاگرام پوسٹ میں اپنی تصویر اور راج پال یادو کے کردار کی تصویروں کو شیئر کرتے ہوئے لکھا کہ ’راج پال یادیو سے کسی کو کوئی مسئلہ نہیں ہوا تھا لیکن جب میں نے یہ روپ دھارا تو سب کو مجھ سے مسئلہ ہوگیا ہے، مجھے بغیر کسی وجہ کے ریپ اور قتل کی دھمکیاں مل رہی ہیں۔‘
مزید پڑھیں
انہوں نے مزید لکھا کہ ’مذہب کے نام نہاد محافظ لوگ اس پر اُٹھ کھڑے ہوئے ہیں کہ میں نے ’بھول بھلیاں‘ فلم کے 10 برس بعد ایسا لباس پہنا ہے۔ کوئی بھی رنگ کسی مذہب کا نہیں ہوتا، اگربتی کسی مذہب کی نہیں ہوتی اور پھول بھی کسی مذہب کے نہیں ہوتے۔‘
عرفی جاوید کی انسٹاگرام پوسٹ میں انہیں پورے بازو والی سرخ رنگ کی ٹی شرٹ اور زرد رنگ کی پینٹ پہنے ہوئے دیکھا جا سکتا ہے۔ انہوں نے اس تصویر میں پھولوں والا ہار بھی پہن رکھا ہے اور اپنے چہرے پر سرخ رنگ کا پینٹ کروایا ہوا ہے۔
سوشل میڈیا استار کو متنازع تصاویر اور ویڈیوز شیئر کرنے کی وجہ سے کڑی تنقید کا نشانہ بنایا جاتا ہے۔ یاد رہے کہ 2007 میں ریلیز ہونے والی فلم ’بھول بھلیاں‘ کی مرکزی کاسٹ میں اکشے کمار، ودیا بالن، پاریش راول، امیشا پٹیل اور راج پال یادیو شامل تھے۔
