معروف پورن سٹار اور بھارتی اداکارہ سنی لیون نے اعتراف کیا ہے کہ ان کے بالغ فلموں میں کام کرنے کی وجہ سے ان کی والدہ شراب نوشی میں مبتلا ہوئیں۔
ایک ٹی وی شو میں اپنے ماضی کے بارے میں گفتگو کرتے ہوئے سنی لیون نے بتایا کہ ان کی والدہ کا انتقال 2008 میں ہوا تھا، اس کے بعد وہ بھارت منتقل ہوئیں اور ہندی فلموں میں کام شروع کیا۔ بگ باس کے سیزن 5 سے انہوں نے کافی شہرت پائی۔ انہوں نے کہا کہ والدہ کی شراب نوشی کی وجہ سے وہ بہت سے گھریلو مسائل کا شکار رہیں۔
سنی لیون کا کہنا تھا کہ ایڈلٹ انٹرٹینر (بالغ فلموں کی اداکارہ) بننے کا فیصلہ بھی والدہ کی شراب نوشی کا ’محرک‘ تھا۔ کینیڈا میں بھارتی سکھ گھرانے میں پیدا ہونے والی کرن جیت کور ووہرا (سنی لیون) نے اپنے خاندان کی خواہش کے خلاف بالغ فلموں میں کام کا فیصلہ کیا تھا۔
سنی لیون نے کہا کہ وہ 13 مئی 1981 کو کینیڈا میں پیدا ہوئیں۔ 14 پندرہ برس کی تھیں جب وہ امریکا منتقل ہوئیں وہاں ایک بالغ میگزین کے لیے فوٹو شوٹ کیا جس کے بعد انہیں بالغ فلموں میں کام کی پیشکش ہوئی جس کا 12 سے 15 ہزار ڈالرز کا ہفتہ وار پرکشش معاوضہ کسی اور کام سے بہت زیادہ تھا۔
سنی لیون کا کہنا تھا کہ انہوں نے اکثر بالغ فلمیں لڑکیوں کے ساتھ کیں جبکہ سابق بوائے فرینڈ ٹومی گن کے ساتھ ایک فلم کی۔ زیادہ فلمیں اپنے بوائے فرینڈ اور اب شوہر ڈینیئل ویبر کے ساتھ کیں۔ ڈینیئل ویبر سے شادی کے بعد سنی لیون نے 2017 میں 3 بچوں کو گود لیا تھا جن میں نوح اور ایشر لڑکے جبکہ ایک لڑکی نشا ہے۔
سنی لیون بگ باس سیزن 5 میں شرکت کے لیے بھارت آئی تھیں۔ اسی شو میں مہیش بھٹ نے انہیں اپنی فلم جسم 2 میں کردار کی پیش کش کی تھی۔ اس کے بعد انہوں نے راگنی ایم ایم ایس 2، ایک پہیلی لیلیٰ اور مست زادے جیسی فلموں میں اداکاری کی۔ حال ہی میں انہوں نے انوراگ کشپ کی فلم کینیڈی میں اداکاری کی ہے، جس کا پریمیئر کانز فلم فیسٹیول میں ہوا تھا۔
