نواز شریف کی قیادت میں عوام کی عدالت میں جانے کو تیار ہیں، شہباز شریف

سابق وزیراعظم اور پاکستان مسلم لیگ (ن) کے صدر شہباز شریف نے آئندہ عام انتخابات کی تاریخ کے اعلان کا خیر مقدم کیا ہے۔

اپنے جاری بیان میں انہوں نے کہا کہ انتخابات کے ذریعے عوامی قیادت آئے گی تو عوام کی زندگی میں خوشحالی آئے گی، مسلم لیگ (ن) نواز شریف کی قیادت میں عوام کی عدالت میں جانے کو تیار ہے۔

شہباز شریف نے کہا کہ قومی اسمبلی تحلیل کرنے والوں کو سپریم کورٹ نے ان کے جرم کی سنگینی بتا دی ہے، 3 اپریل اور 9 مئی کے جرم کی سزا آئین و قانون کی سربلندی اور ریاست کی عملداری کا معاملہ ہے۔

انہوں نے مزید کہا کہ مسلم لیگ (ن) واحد جماعت ہے جس نے سب سے پہلے الیکشن کا عمل شروع کیا، اس حوالے سے پارٹی کا الیکشن سیل، پارلیمنٹری بورڈز، منشور کمیٹی کی تشکیل ہو چکی ہے جبکہ یکم نومبر سے امیدواروں سے درخواستوں کی وصولی شروع کی جا چکی ہے  جس سے ظاہر ہوتا ہے کہ مسلم لیگ (ن) الیکشن کے لیے تیار ہے ۔

انہوں نے کہا کہ اب کی بار موقع ملا تو ملک میں ترقی کا عمل پھر سے شروع کریں گے، 2018ء میں ملک ترقی کی جس بلندی پر تھا، نہ صرف اسی مقام پر واپس لائیں گے بلکہ وہاں سے آگے لے کر جائیں گے، ملک میں دوبارہ امن لائیں گے، توانائی بحران کا خاتمہ، بے روزگاری اور مہنگائی سے عوام کی جان چھڑائیں گے، نوجوانوں کی ترقی، کاروبار اور ہنرمندی کا دور پھر سے شروع ہو گا۔

واضح رہے کہ 90 دن میں عام انتخابات سے متعلق کیس پر سپریم کورٹ کے فیصلے کے بعد الیکشن کمیشن نے آئندہ انتخابات کی تاریخ کا نوٹیفیکیشن بھی جاری کردیا ہے جس کے مطابق ملک میں قومی اور صوبائی اسمبلیوں کے انتخابات 8 فروری 2024ء (جمعرات) کو ہوں گے۔