ایلون مسک نے کہا ہے کہ ان کی آرٹیفیشل انٹیلی جنس (AI) کمپنی ’xAI‘ آج بروز ہفتہ اپنی ٹیکنالوجی کا آغاز کرے گی۔
چند معاملات میں سب سے بہتر ٹیکنالوجی
جمعہ کو سماجی رابطہ کی ویب سائٹ ایکس پر ایک پوسٹ میں انہوں نے کہا، ’xAI کل اپنی پہلی AI ایک منتخب گروپ کو جاری کرے گی، کچھ اہم معاملات میں یہ اب تک کی سب سے بہتر ٹیکنالوجی ہے‘۔
ایلون مسک نے اس نئی اے آئی کمپنی کا اعلان جولائی میں کیا تھا اور کہا تھا کہ اس کا مقصد ’کائنات کی اصل نوعیت کو سمجھنا‘ ہے۔ ایلون مسک کی جانب سے اس کمپنی کے قیام کا مقصد بظاہر اوپن اے آئی، گوگل اور ایتھراپک جیسی کمپنیوں سے مقابلہ کرنا ہے جو چیٹ جی پی ٹی، بارڈ اور کلاڈ جیسے چیٹ بوٹس کے پس پردہ ہیں۔
Tomorrow, @xAI will release its first AI to a select group.
In some important respects, it is the best that currently exists.
— Elon Musk (@elonmusk) November 3, 2023
مسک کا کہنا تھا کہ یہ کمپنی ایکس (سابقہ ٹویٹر)، ٹیسلا اور ان کی دیگر کمپنیوں کے ساتھ مل کر کام کرے گی اور ان کے ترقی کے مشن میں ان کا ساتھ دے گی۔
ہر شے کا نظریہ مرتب کرنے والی ٹیکنالوجی
xAI کے شریک بانی گریگ یانگ نے کہا ہے کہ نئی اے آئی ٹیکنالوجی ’گہرے مطالعہ کا حساب کتاب‘ لگائے گی اور بڑے نیورل نیٹ ورکس کے لیے ’ہر شے کا نظریہ‘ مرتب کرے گی اور اے آئی کو ایک قدم اور آگے لئ جائے گی۔
مزید پڑھیں
مسک نے اپریل میں ایک انٹرویو میں اپنے ایک نئے اے آئی ٹول ’ٹروتھ جی پی ٹی‘ کے بارے میں بتایا تھا اور کہا تھا کہ انہیں خدشہ ہے کہ موجودہ اے آئی کمپنیاں ایسے نظاموں کو ترجیح دے رہی ہیں جو ’سیاسی طور پر درست‘ ہیں۔
اے آئی ٹیکنالوجی دنیا کے خاتمے کا باعث بن سکتی ہے، ایلون مسک
واضح رہے کہ ایلون مسک نے یکم نومبر (بدھ) کو دنیا کی پہلی اے آئی سیفٹی کانفرنس کے دوران خطاب میں کہا تھا کہ اے آئی ٹیکنالوجی انسانیت کے خاتمے کا باعث بن سکتی ہے۔ 2 روزہ کانفرنس کے آخری روز ایلون مسک نے اپنے بیان کو بدلتے ہوئے کہا کہ اے آئی ٹیکنالوجی کے باعث بتدریج دنیا بھر میں ہر فرد کو ملازمت سے محروم ہونا پڑے گا اور یہ ٹیکنالوجی تاریخ کی سب سے زیادہ انتشار انگیز طاقت بن سکتی ہے۔
یکم نومبر کو برطانیہ میں شروع ہونے والی 2 روزہ اس کانفرنس میں امریکا، چین، بھارت، جرمنی اور فرانس سمیت 28 ملکوں کے حکومتی وفود شریک ہیں۔
