سابق وزیر دفاع اور پاکستان مسلم لیگ (ن) کے سینئر رہنما خواجہ محمد آصف نے کہا ہے کہ نواز شریف فٹ ہیں اور وہ آئندہ الیکشن ضرور لڑیں گے۔ کون کس حلقے سے الیکشن لڑے گا اس کا فیصلہ ہونا باقی ہے۔
خواجہ محمد آصف نے لاہور میں پاکستان مسلم لیگ (ن) کے مرکزی سیکریٹریٹ 180 ایچ ماڈل ٹاؤن میں نواز شریف سے ملاقات کے بعد واپس جاتے ہوئے صحافیوں کے سوالات کے مختصر جوابات میں کہا کہ میں بھی جسمانی اور سیاسی طور پر فٹ ہوں، الیکشن ضرور لڑوں گا۔
ایک سوال پر ان کا کہنا تھا کہ سب سیاسی جماعتوں کے پاس لیول پلیئنگ فیلڈ ہے، کھڈا شڈا کہیں نہیں ہے۔
واضح رہے کہ پاکستان مسلم لیگ (ن) کے قائد نواز شریف کی وطن واپسی کے بعد ان کا پارٹی کے مرکزی سیکریٹریٹ میں پہلا دن تھا۔ انہوں نے سینئر لیگی قیادت سے ملاقاتیں کیں۔
