اسرائیلی جارحیت اور غزہ کا محاصرہ فوری طور پر ختم کیا جائے، نگراں وزیر خارجہ جلیل عباس جیلانی

نگراں وزیر خارجہ جلیل عباس جیلانی نے فلسطینی بھائیوں اور بہنوں کے ساتھ پاکستان کی مکمل یکجہتی کا اظہار کرتے ہوئے کہا ہے کہ غزہ میں محصور خواتین اور بچوں سمیت شہریوں کے خلاف اسرائیل کا وحشیانہ اور اندھا دھند طاقت کا استعمال قابل مذمت ہے۔ اسرائیلی جارحیت اور غزہ کا محاصرہ فوری طور پر ختم کیا جائے۔ معصوم بچوں اور شہریوں کی شہادتوں پر ہم غمگین ہیں۔ ہمارا مطالبہ ہے کہ فلطینیوں کو ان کا حق دیا جائے۔ ہمارا عالمی برادری سے مطالبہ آزاد فلسطین ریاست کا قیام ہے جس کا دارالحکومت القدس شریف ہو۔ پاکستان ہمیشہ فسلطینی بہن بھائیوں کے ساتھ کھڑا رہا ہے اور ہمیشہ کھڑا رہے گا۔

نگراں وزیر خارجہ جلیل عباس جیلانی اور وزیر برائے انسانی حقوق خلیل جارج نے مقبوضہ غزہ کے عوام کے لیے پاکستان سے امدادی سامان کی دوسری کھیپ لے جانے والی خصوصی پرواز کو الوداع کیا۔ اس موقع پر انہوں نے بتایا کہ کھیپ میں 40 ٹن راشن کے بیگز، ادویات، حفظان صحت کی کٹس اور فوڈ پیکجز شامل ہیں۔

اسلام آباد میں فلسطین کے سفیر احمد جواد ربیعی اور وزارت خارجہ اور این ڈی ایم اے کے سینئر حکام بھی اسلام آباد انٹرنیشنل ایئرپورٹ پر امدادی کھیپ بھجوانے کی تقریب میں موجود تھے۔ پہلی کھیپ 19 اکتوبر 2023 کو بھیجی گئی تھی۔