چیف آف آرمی اسٹاف جنرل سیّد عاصم منیر نے کہا ہے کہ بہترین نشانہ بازی ایک فوجی کا طرہ امتیاز ہوتا ہے۔ شوٹنگ میں مہارت حاصل کرنا بنیادی فوجی تربیت کے مقاصد میں رہنا چاہیے۔
پاک فوج کے شعبہ تعلقات عامہ (آئی ایس پی آر) کے مطابق پاکستان آرمی رائفل ایسوسی ایشن کے زیراہتمام جہلم میں 43ویں شوٹنگ مقابلے اختتام پذیر ہو گئے ہیں۔
چیف آف آرمی اسٹاف جنرل سید عاصم منیر تقریب کے مہمان خصوصی تھے جبکہ چیف آف ایئراسٹاف ایئرچیف مارشل ظہیر احمد بابر گیسٹ آف آنر تھے۔
مزید پڑھیں
تقریب میں آرمی چیف اور ایئرچیف نے فاتح اور رنر اپ رہنے والوں کو میڈلز اور ٹرافیاں دیں۔ ایونٹ میں فورسز کے 2 ہزار اہلکاروں نے حصہ لیا۔
آئی ایس پی آر کے مطابق انٹر سروسز میچز میں پاکستان آرمی نے چاروں مقابلے جیت لیے جبکہ پاکستان نیوی اور پاکستان ایئر فورس نے بالترتیب دوسری اور تیسری پوزیشن حاصل کی۔
پریذیڈنٹ کپ نیشنل چیلنج میچ کی ٹرافی آرمی نشانہ باز یونٹ کے نائیک وسیم کو دی گئی۔ پاک فوج نے پرائم منسٹر اسکلز ایٹ آرمز بگ بور نیشنل چیلنج بھی جیت لیا۔ جبکہ پیرا فائرنگ میچز میں پاکستان رینجرز پنجاب نے پہلا انعام حاصل کیا۔
شوٹنگ کا اعلیٰ ترین اعزاز ماسٹر ایٹ آرمز ٹرافی تھرٹی فرنٹیئر کور رجمنٹ کے لانس نائیک بنارس نے جیتا، بیسٹ شاٹ میچ ٹرافی میڈیم رجمنٹ آرٹلر نائیک شیرافضل کے نام رہی۔
قبل ازیں چیف آف آرمی اسٹاف جنرل سید عاصم منیر کا انسپکٹر جنرل ٹریننگ اینڈ ایویلوایشن نے تقریب میں آمد پر استقبال کیا۔
