ہمارا مقصد نواز شریف کی قیادت میں پاکستان کی ترقی ہے، شہباز شریف

سابق وزیراعظم اور پاکستان مسلم لیگ (ن) کے صدر شہباز شریف سے آج سابق ارکان قومی و صوبائی اسمبلی نے علیحدہ علیحدہ ملاقات کی۔

ملاقات کرنے والے سابق ارکان قومی اسمبلی میں افتخار نذیر چودہری، رانا اشتیاق خان اور ساجد مہدی شامل تھے۔ جب کہ شہباز شریف سے سابق ارکان صوبائی اسمبلی انجینئر قمر علی السلام اور احسان رضا خان نے بھی ملاقات کی۔

ملاقات میں آئندہ عام انتخابات اور پارٹی کی سیاسی سرگرمیوں کے حوالے سے تبادلہ خیال کیا گیا۔

شہباز شریف نے 21 اکتوبر کو مینار پاکستان پر تاریخی جلسہ منعقد کرنے پر پارٹی رہنماؤں اور کارکنوں کی تعریف کی۔ اس موقع پر گفتگو میں شہباز شریف نے کہا کہ نواز شریف کی قیادت میں پاکستان کی ترقی اور خوشحالی ہمارا مقصد ہے۔

انہوں کہا کہ مہنگائی سے عوام کی جان چھڑانی ہے، ترقی کے سفر کا پھر آغاز ہونے والا ہے۔ اللہ تعالیٰ کے فضل سے تعمیر، ترقی اور معاشی بحالی کے تاریخی عمل کا دوبارہ آغاز کریں گے۔ شہباز شریف کا کہنا تھا کہ نواز شریف نے ہمیشہ ملک اور عوام کی خدمت کی۔

ملاقات میں شہباز شریف نے انجینئر قمر السلام کی قربانیوں اور پارٹی کے لئے خدمات کو سراہا، ان کا کہنا تھا کہ پارٹی راہنماؤں اور کارکنوں نے بڑی بہادری اور وقار سے سیاسی انتقام کے سیاہ دور کا مقابلہ کیا۔