اسرائیل کی جانب سے مقبوضہ فلسطین کے علاقے غزہ پر فضائی حملے جاری ہیں جس کے نتیجے میں اب تک تقریباً 11 ہزار فلسطینی شہید ہوچکے ہیں جن میں اب مقبوضہ فلسطین کی مزاحمتی تنظیم حماس کے سربراہ اسماعیل ہنیہ کی پوتی رؤی ہمام اسماعیل ہنیہ بھی شامل ہوگئیں جنہوں نے جمعے کو ایسے ہی ایک حملے میں جام شہادت نوش کرلیا۔
عرب میڈیا کے مطابق براق اسکول پر اسرائیلی فوج کی بمباری میں شہید ہونے والی رؤی ہنیہ اسلامی یونیورسٹی آف غزہ میں میڈیکل کی طالبہ تھیں۔ اس حملے میں اب تک 25 فلسطینی شہید ہوچکے ہیں۔ اسرائیل کی جانب سے شہری آبادیوں اور اسکولوں کے علاوہ اسپتالوں کو بھی نشانہ بنایا جا رہا ہے۔
یاد رہے کہ پوتی کے علاوہ اس سے قبل اسماعیل ہنیہ کے دیگر لخت جگر بھی اسرائیلی حملوں میں جام شہادت نوش کرچکے ہیں جن میں ان کی بیٹے، بیٹی، پوتے اور پوتیوں سمیت 14 افراد شامل تھے۔ شہدا میں ہنیہ کے ایک بیٹے حافظ قرآن بھی تھے۔
اسرائیلی فوج کا کہنا ہے کہ حماس کے پاس صرف 2 آپشن ہیں یا تو مر جائیں یا ہتھیار ڈال دیں۔
