راولپنڈی کی انسدادِ دہشت گردی کی عدالت نے شیخ رشید اور ان کے بھتیجے شیخ راشد شفیق کی عبوری ضمانتوں میں 9 دسمبر تک توسیع کر دی۔ شیخ رشید احمد پر 9 مئی کے واقعات میں ملوث ہونے کا الزام تھا، مقدمات پر شیخ رشید کی جانب سے عبوری ضمانت دائر کرنے پر سماعت مقرر کی گئی تھی۔ اس موقع پر انہوں نے گفتگو کرتے ہوئے کہا کہ مری میں چہل قدمی کرنے سے الیکشن مہم نہیں ہوتی، جب عوام میں نکلیں گے تو لگ پتا جائے گا۔
شیخ رشید احمد اپنے وکیل سردار عبدالرازق ایڈوکیٹ کے ہمراہ عدالت پہنچے، کیس کی سماعت انسداد دہشتگردی عدالت کے جج ملک اعجاز آصف نے کی، سابق وزیرِ داخلہ شیخ رشید اور شیخ راشد شفیق کی 9 مئی کے 8 مقدمات میں عبوری ضمانتوں پر سماعت ہوئی۔
مزید پڑھیں
شیخ رشید احمد اور بھتیجے شیخ راشد شفیق کی 25 نومبر تک ضمانت میں توسیع کی گئی، شیخ رشید احمد نے 5 نومبر کو عبوری ضمانت کے لیے عدالت سے رجوع کیا تھا۔
بعد ازاں انسدادِ دہشت گردی کی عدالت کے باہر میڈیا سے گفتگو کرتے ہوئے شیخ رشید نے کہا کہ ہمارا اصل کیس لاہور ہائیکورٹ پنڈی بینچ میں 30 نومبر کو ہو گا۔ آج سرکاری پراسیکیوٹرز نے دلائل کے لیے پھر وقت مانگا ہے، ہم عبوری ضمانتوں پر دلائل کے لیے تیار تھے۔
شیخ رشید نے یہ بھی کہا کہ مری میں چہل قدمی کرنے سے الیکشن مہم نہیں ہوتی، انہیں لگ پتہ جائے گا جب یہ عوام میں ووٹ لینے کے لیے نکلیں گے۔ الیکشن ہو کر رہیں گے اور شاید اسی سے کوئی بہتری آجائے، جو بھی حکومت میں آئے گا اس کےلیے معشیت بہت بڑا چیلنج ہوگا۔
