لاہور میں اسٹریٹ کرائم سے نمٹنے کے لیے پنجاپ پولیس کا معروف ایلیٹ یونٹ ڈولفن فورس پیٹرول کی عدم دستیابی کے باعث اپنے فرائض کی ادائیگی میں رکاوٹ سے دوچار ہے جبکہ دوسری جانب شہری جرائم کی شرح میں اضافے کے خدشہ کا اظہار کررہے ہیں۔
ذرائع نے انکشاف کیا ہے کہ اپنے تیز ردعمل اور جرائم کی روک تھام کے اقدامات کے لیے معروف ڈولفن فورس ایندھن کے لیے ضروری بجٹ کے حصول میں ناکام رہی ہے، جس کی وجہ سے شہر بھر میں اس کی گشت کرنے کی صلاحیتیں عارضی طور پر معطل ہو کر رہ گئی ہیں۔
لاہور میں والٹن روڈ پر واقع ڈولفن فورس کمانڈ سینٹر کی سربراہی سپرنٹنڈنٹ آف پولیس کے ذمہ ہے، شہر میں ڈولفن فورس کو سگیاں پل، اقبال ٹاؤن، ہربنس پورہ، چنگ، سول لائنز اور ماڈل ٹاؤن سمیت کئی شہری علاقوں میں تقسیم کیا گیا ہے، ہر علاقے میں 50 موٹر سائیکلیں ہیں۔
ڈولفن فورس کے لیے پیٹرول کی قلت نے شہریوں اور قانون نافذ کرنے والے اہلکاروں میں یکساں طور پر تشویش کو جنم دیا ہے، امن و امان برقرار رکھنے میں اہم کردار ادا کرنیوالی ڈولفن فورس اپنے وسائل کی حصول میں حائل رکاوٹوں سے نبردآزما ہے، جس کے باعث معمول کے گشت کو انجام دینے اور ابھرتے ہوئے سیکورٹی خطرات کا تیزی سے جواب دینے کی صلاحیت میں رکاوٹ پیش آرہی ہے۔
لاہور پولیس حکام کی جانب سے جاری بیان میں انکشاف کیا گیا ہے کہ ڈولفن فورس پیٹرول کی خریداری کے لیے بجٹ کے اجراء کا بے صبری سے انتظار کر رہی ہے۔ ایک بار ضروری فنڈز دستیاب ہونے کے بعد، فورس سے توقع کی جاتی ہے کہ وہ اپنا باقاعدہ گشت فوری طور پر دوبارہ شروع کر دے گی۔
ڈولفن فورس پنجاب پولیس کی ایک ایلیٹ یونٹ ہے جو اسٹریٹ کرائم سے نمٹنے پر توجہ دیتی ہے۔ اسے استنبول پولیس ڈولفن فورس کے مطابق بنایا گیا تھا اور اس کا آغاز وزیراعلیٰ پنجاب شہباز شریف نے 2016 میں لاہور میں کیا تھا۔ تب سے اب تک اسے صوبے کے چھ دیگر شہروں تک پھیلا دیا گیا ہے، جس میں کل 696 پولیس اہلکار تربیت یافتہ ہیں۔
