جونیئر عالمی ہاکی کپ میں پاکستان اور ہالینڈ کے مابین میچ 3-3 گول سے برابر ہوگیا، پاکستان جونیئرز ہاکی ٹیم کی جانب سے شاندار کھیل کا مظاہرہ کرتے ہوئے ارشد لیاقت، سفیان خان اور ارباز احمد نے گول اسکور کیے۔
تفصیلات کے مطابق ملائیشیا کے شہر کوآلالمپور میں جاری جونیئر عالمی ہاکی کپ میں پاکستان اور ہالینڈ کے مابین میچ 3 گول سے برابر رہا۔ دونوں ٹیموں کی جانب سے بہترین کھیل کا مظاہرہ کرتے ہوئے ایک دوسرے کی گول پوسٹ پر بھرپور حملے کیے گئے۔
مزید پڑھیں
ہالینڈ ٹیم کھیل کے 21ویں اور 30 منٹ میں فیلڈ گول کرنے میں کامیاب رہی، پاکستان کو پہلے ہاف کے اختتام تک 2 گول کے خسارے کا سامنا رہا، پاکستان نے تیسرے کواٹر میں کم بیک کرتے ہوئے مڈ فیلڈر ارشد لیاقت کے ذریعہ فیلڈ گول اسکور کرکے اس خسارے کو کم کیا۔
تیسرے کواٹر کے 36ویں منٹ میں پاکستان کو پینلٹی کارنر کے ذریعہ سفیان خان نے تیزرفتا ڈریگ فلک کو گول پوسٹ کی راہ دکھائی اور پاکستان کا اسکور اس موقع پر 2-2 سے برابر ہوا۔ ہالینڈ نے کھیل کے 47ویں منٹ میں فیلڈ گول اسکور کرکے برتری قائم کی جوکہ پاکستان کے ارباز احمد نے پینلٹی کارنر کےذریعہ گول اسکور کرکے اس برتری کا خاتمہ کیا۔
میچ کے اختتام تک مقابلہ 3-3 گول سے برابر رہا، اس طرح دونوں ٹیموں کے درمیان میچ بغیر کسی نتیجے کے ڈرا ہو گیا۔
واضح رہے ملائیشیا میں کھیلے جانے والےجونیئر عالمی ہاکی کپ میں 16 ٹیمیں شرکت کررہی ہیں۔ پاکستان ٹیم پول ڈی میں شامل ہے جس میں ہالینڈ، بیلجیئم، نیوزی لینڈ اور پاکستان شامل ہیں۔ پاکستان اپنا دوسرا میچ نیوزی لینڈ کے خلاف 7 دسمبر کو کھیلے گا۔
