کھیل کا کوئی بھی میدان ہو، روایتی حریف پاکستان و بھارت آمنے سامنے ہوں تو کوئی بھی جیت سے کم کسی بات پر تیار نہیں ہوتا۔
دنیائے ہاکی کا حکمراں رہنے والے پاکستان کی ٹیم نے گزشتہ روز ایشیا کپ ہاکی ٹورنامنٹ کے میچ میں انڈیا کو 4 کے مقابلے میں 5 گول سے شکست دی۔
اس کے بعد ٹائم لائنز پر اطلاع دی گئی کہ پاکستان ہاکی فیڈریشن کے صدر بریگیڈیئر (ر) خالد سجاد کھوکھر نے ’شاندا کارکردگی دکھانے پر کھلاڑیوں کے لیے انعام کا اعلان کیا۔
پاکستان کے قومی کھیل ہاکی کے کھلاڑیوں کو 100 ڈالر کا انعام دیے جانے کی اطلاع ہاکی ٹیم کے ایک فین پیج کے ذریعے فیس بک پر شیئر کی گئی۔
میچ میں کامیابی حاصل کرنے والی قومی ٹیم کو مبارکباد دی گئی۔ اسی دوران کچھ افراد نے انعامی رقم کی مقدار کی نشاندہی کی تو گفتگو کا رخ اس جانب مڑ گیا۔
انجم شہزاد اعوان نے ایسے انعامات کو ’کھیل کا یہ حال‘ کر دینے کا باعث ٹھہرایا تو لکھا کہ ’کہاں ورلڈ چیمپیئن اور کہاں عالمی کپ سے باہر۔ خدا کا خوف کرو ان بچوں کو اتنا تو دو کہ گھر کا خرچ تو پورا کر سکیں۔‘
اسامہ نے اپنے تبصرے میں لکھا کہ ’فی کھلاڑی 100 ڈالر کی رقم‘ پر ’خوشی کے شادیانے بجائیں یا شرمندگی محسوس کریں۔‘
عمان میں جاری فائیو سائیڈ ایشیا ہاکی کپ کے انڈیا کے خلاف میچ میں پاکستان کی جانب سے ارشد لیاقت نے 2 گول، ذکریا حیات، عبدالرحمٰن اور رانا عبدالوحید نے ایک، ایک گول اسکور کیا۔
