بلاول بھٹو زرداری نے کہا کہ ہمیں ٹک ٹاک اور گالم گلوچ کی سیاست نہیں آتی، اور نہ ہی گیٹ نمبر 4 کی طرف دیکھتے ہیں، ہم صرف اور صرف عوامی سیاست پر یقین رکھتے ہیں۔ اس بار حکومت پیپلز پارٹی کی ہی ہوگی۔
شانگلہ میں ورکرز کنونشن سے خطاب کرتے ہوئے چیئرمین پاکستان پیپلز پارٹی بلاول بھٹو زرداری نے کہا کہ شانگلہ کے لوگوں کا دل سے مشکور ہوں کہ انہوں نے والہانہ استقبال کیا۔ آج کھل کر کہنا چاہتا ہوں کہ پاکستان کے عوام کومشکلات کا سامنا ہے، معاشی حالات ابترہوتے جارہے ہیں۔
مزید پڑھیں
بلاول بھٹو زرداری نے کہا کہ انا کی سیاست کرنے والے پرانے سیاستدان عوامی مسائل سے آگاہ ہی نہیں ہیں، ملک میں تقسیم کی سیاست عروج پر ہے، سیاست کو اختلاف رائے کے بجائے ذاتی دشمنی تک پہنچا دیا گیا ہے۔ ایک طرف نفرت اور تقسیم کی سیاست جاری ہے اور دوسری طرف معاشی بحران بد سے بدترہوتا جا رہا ہے۔
سابق وزیر خارجہ نے ورکرز کنونشن سے خطاب کے دوران بات کرتے ہوئے کہا کہ سیاستدان آج بھی پرانی سیاست کر رہے ہیں، ہمیں گالم گلوچ اور گیٹ نمبر4 کی سیاست نہیں آتی، پیپلزپارٹی کا مقابلہ کسی اور سے نہیں غربت اور بے روزگاری سے ہے۔
انہوں نے کہا کہ 19 سال کی عمر میں سیاست میں آیا تھا، میرے ہاتھ آج بھی صاف ہیں، کوئی سیاسی جماعت اور سیاست دان نہیں جس کے ہاتھ صاف نہ ہوں۔ میرے ہاتھوں پر کرپشن کا داغ ہے نا کہ عوام کے خون کا۔
چیئرمین پیپلزپارٹی کا کہنا تھا کہ روزگاردینا جرم ہے تو یہ جرم باربار کروں گا، وعدہ کرتا ہوں 5 سال میں تنخواہیں دگنی کریں گے، پیڈ انٹرنشپس دیں گے، سکل ورکرز کو مواقع فراہم کریں گے۔ ثابت کروں گا کہ کیسے ملک اور عوام کی قسمت تبدیل کریں گے۔
