نقیب اللہ قتل کیس: راؤ انوار کی بریت کیخلاف اپیل سندھ ہائیکورٹ میں سماعت کے لیے منظور

سندھ ہائیکورٹ میں نقیب اللہ قتل کیس میں مقتول کے بھائی کی اپیل سماعت کے لیے منظور کر لی گئی۔ عدالت نے انسداددہشت گردی عدالت سے کیس کا مکمل ریکارڈ طلب کرتے ہوئے پراسکیوٹر جنرل سندھ سے بھی جواب طلب کرلیا۔

سابق ایس ایس پی ملیر راؤ انوار و دیگر کی بریت کے خلاف اپیلوں پر سماعت ہوئی، اپیل مقتول نقیب اللہ کے بھائی عالم شیر کی جانب سے دائر کی گئی، جس پر عدالت نے انسداد دہشت گردی عدالت سے کیس کا مکمل ریکارڈ طلب کیا اور ساتھ ہی پراسیکیوٹر جنرل سندھ سے بھی جواب طلب کرلیا۔

اپیل میں موقف اختیار کیا گیا کہ انسداد دہشت گردی عدالت نے راؤ انوار سمیت دیگر ملزمان کو بری کرکے اہم شواہد کو نظر انداز کیا ہے، تاہم عدالت سے استدعا کی جاتی ہے کہ انسداد دہشت گردی کے فیصلے کو کالعدم قرار دیا جائے۔

واضح رہے انسداد دہشت گردی عدالت نے نقیب اللہ قتل کیس کا فیصلہ 23 جنوری 2023 کو سنایا تھا، اورعدالت نے عدم شواہد کی بنا پر راؤ انوار سمیت 18 ملزمان کو بری کردیا تھا۔