پاکستان پیپلزپارٹی (پی پی پی) کے شریک چیئرمین و سابق صدر مملکت آصف زرداری نے کہا ہے کہ بلوچستان کے عوام کا دکھ ہم سمجھتے ہیں۔ ہم اقتدار میں آکر ملکی کی معاشی صورت حال بہتر کریں گے۔
پاکستان پیپلزپارٹی نے تربت میں ورکرز کنونشن کا انعقاد کیا جہاں سابق نگراں وفاقی وزیر داخلہ سرفراز بگٹی سمیت دیگر اہم شخصیات نے پیپلزپارٹی میں شمولیت اختیار کر لی۔
سرفراز بگٹی کو سابق صدر مملکت آصف علی زرداری نے شمولیت کے موقع پر پارٹی کے پرچم والا مفلر پہنایا۔
واضح رہے کہ سرفراز بگٹی نگراں حکومت میں نگراں وفاقی وزیر داخلہ تھے اور حال ہی میں عہدے سے استعفیٰ دیا تھا۔
مزید پڑھیں
ورکرز کنونشن سے خطاب کرتے ہوئے آصف زرداری نے کہاکہ بلوچستان میں بہت وسائل ہیں اور آگے بڑھنے کی گنجائش ہے۔
’اسلام آباد نے بلوچستان کو پاکستان سمجھا ہی نہیں، میں نے بغیر کہے پختونوں کو نام دے کر ان کی شناخت دی، اگر یہ جرم ہے تو مزید جیل کاٹ لیں گے‘۔
“پاکستان پیپلز پارٹی جب بھی اقتدار میں آتی ہے تو عوام کی خدمت کیلئے آتی ہے نہ کہ اپنے لیے۔”
صدر آصف علی زرداری@AAliZardari pic.twitter.com/9Jy0GcCUP2
— PPP (@MediaCellPPP) December 18, 2023
انہوں نے کہاکہ ہم نے شہدا کا بیڑا اٹھایا ہے، دنیا میں بہت کم لوگ ایسے ہیں جنہوں نے میری جتنی جیل کاٹی ہو۔ ہمارے ملک میں پہلے ذوالفقار بھٹو کو پھانسی دی گئی اور پھر بینظیر کو شہید کر دیا گیا۔
میں نے اختیارات پارلیمنٹ کو منتقل کیے، آصف زرداری
آصف زرداری نے کہاکہ میں نے پارلیمنٹ کو اختیارات منتقل کیے، ہم اب بھی اقتدار میں آکر عوام کے مسائل حل کریں گے اور بلوچستان کو تاجکستان کے ذریعے پانی دیں گے۔
سابق صدر مملکت نے کہاکہ میں نے چین کے 15 دورے کیے تب کہا جا رہا تھا کہ یہ چائنا کیوں جاتا ہے، آپ کو نظر نہیں آ رہا تھا کہ یہاں گوادر ہے۔
انہوں نے کہاکہ جنگ میں قومیں ترقی نہیں کرتیں، سب کچھ پیار اور بھائی چارے سے ہو گا۔
سابق صدر نے کہاکہ افغانوں کی ہم نے 40 سال تک مہمان نوازی کی، دنیا میں کوئی قوم دوسری قوم کو برداشت نہیں کرتی۔
آصف زرداری نے کہاکہ پیپلزپارٹی جب بھی اقتدار میں آتی ہے عوام کے مسائل حل ہوتے ہیں، اقتدار ہماری مجبوری نہیں بلکہ بھٹو شہید اور بینظیر شہید کا قرض ہے۔
پیپلزپارٹی میں شمولیت اختیار کرنا میرے لیے اعزاز ہے، سرفراز بگٹی
اس سے قبل سرفراز بگٹی نے اپنے خطاب میں کہاکہ پیپلزپارٹی میں شمولیت اختیار کرنا میرے لیے اعزاز کی بات ہے، آصف زرداری نے تربت آکر پارٹی جوائن کرنے کا حکم دیا جس کی تعمیل کی۔
انہوں نے کہاکہ بلوچستان میں امن کا سورج آصف زرداری کی قیادت میں ہی طلوع ہو گا۔ پیپلزپارٹی ملک کے خلاف بیانیہ ضرور چیلنج کرے گی۔
