وزیراعلیٰ پنجاب مریم نواز نے وفاقی وزیر سالک حسین کے تکبر اور عاجزی سے متعلق بیان پر ردعمل دیتے ہوئے کہا ہے کہ جھوٹے الزام لگانا عاجزی ہے اور کوئی اپنا جواب دے تو تکبر ہے؟ واہ۔
مریم نواز نے سماجی رابطے کی ویب سائٹ پر اپنے پیغام میں سالک حسین کے بیان پر طنزیہ انداز میں ردعمل دیا۔ ان کا یہ بیان وفاقی وزیر کی جانب سے پنجاب میں کرپشن کے حوالے سے اپنے مؤقف پر قائم رہنے اور تکبر سے بچنے کی دعا کے بعد سامنے آیا ہے۔
یہ بھی پڑھیں: پنجاب حکومت پر کرپشن کے الزامات، مریم نواز نے چوہدری سالک حسین اور اے آر وائی نیوز کو قانونی نوٹس بھجوا دیا
اس سے قبل وفاقی وزیر سالک حسین سے مریم نواز کے تکبر سے متعلق بیان اور پنجاب میں کرپشن کے الزامات کے بارے میں سوال کیا گیا تھا۔ اس پر سالک حسین نے کہا کہ اللہ تعالیٰ سب کو تکبر اور غرور سے محفوظ رکھے اور عاجزی اختیار کرنے کی توفیق دے، ان کا بیان کسی پر ذاتی حملہ نہیں تھا۔
جھوٹے الزام لگانا عاجزی ہے اور کوئی اپنا جواب دے تو تکبر ہے؟ واہ 👏🏻
— Maryam Nawaz Sharif (@MaryamNSharif) November 3, 2026
پنجاب میں کرپشن کے حوالے سے عظمیٰ بخاری کے ثبوت مانگنے سے متعلق سوال پر سالک حسین نے کہا کہ ثبوت مانگنا درست بات ہے، تاہم انہوں نے اپنے مؤقف کا حوالہ دیتے ہوئے کہا کہ پنجاب میں کرپشن ہو رہی ہے اور اس کے شواہد بھی سامنے آئے ہیں۔
یہ بھی پڑھیں: وزیراعلیٰ مریم نواز کا وفاقی وزیر سالک حسین کے خلاف قانونی چارہ جوئی کا اعلان
وفاقی وزیر نے اپنے بیان کی وضاحت کرتے ہوئے کہا کہ ان کا انٹرویو ایک سادہ سوال جواب کی نشست تھی، اسے اتحادی جماعتوں کے درمیان لڑائی کا رنگ نہیں دینا چاہیے۔ انہوں نے ایک بار پھر کہا کہ اللہ تعالیٰ سب کو عاجزی اختیار کرنے کی توفیق دے اور تکبر سے محفوظ رکھے۔
سالک حسین کے اس بیان پر مریم نواز نے ردعمل دیتے ہوئے سوال اٹھایا کہ جھوٹے الزام لگانا عاجزی ہے اور کوئی اپنا جواب دے تو تکبر ہے؟
