پشاور ہائیکورٹ نے الیکشن کمیشن کو پی ٹی آئی انٹرا پارٹی الیکشن اور انتخابی نشان کیس میں 21 دسمبر تک حتمی فیصلہ جاری کرنے سے روک دیا ہے۔
الیکشن کمیشن کی جانب سے دیے گئے نوٹس کے خلاف تحریک انصاف کی درخواست پر جسٹس ایس ایم عتیق شاہ اور جسٹس صاحبزادہ اسد اللہ پر مشتمل پشاور ہائیکورٹ کے 2 رکنی بینچ نے سماعت کی۔
وکیل الیکشن کمیشن محسن کامران نے عدالت کو بتایا کہ انہوں نے آج ہی جواب جمع کرایا ہے، جس پر چیئرمین تحریک انصاف بیرسٹر گوہر نے اس کی کاپی فراہم کرنے کی استدعا کی، جسٹس ایس ایم عتیق شاہ بولے؛ یہ آپ کا قانونی حق ہے آپ کو کاپی فراہم کریں گے۔
بیرسٹر گوہرخان سے مکالمہ کرتے ہوئے جسٹس ایس ایم عتیق شاہ بولے؛ نیازی صاحب کو آپ پہلی بار پشاور لے آئے ہیں، نیازی صاحب اہم شخصیت ہیں جنہوں نے آپ کا الیکشن کرایا ہے، بیرسٹر گوہر بولے؛ نیازی صاحب پشاور آتے رہتے ہیں، یہ ہمارے لیے بہت اہم ہیں۔
بیرسٹر گوہر خان کی جانب سے الیکشن کمیشن کے جاری کردہ نوٹس کے خلاف عبوری ریلیف میں توسیع کی درخواست عدالت نے منظور کرتے ہوئے الیکشن کمیشن کے نوٹس کیخلاف عبوری ریلیف میں 21 دسمبر تک توسیع کردی۔
