پاکستان پیپلزپارٹی (پی پی پی) کے چیئرمین بلاول بھٹو نے کہا ہے کہ سینیٹ تو کیا اقوام متحدہ اور او آئی سی سے بھی قراردادیں پاس کروا لیں پھر بھی پاکستان میں عام انتخابات 8 فروری کو ہی ہوں گے۔
لاہور میں میڈیا سے گفتگو کرتے ہوئے بلاول بھٹو نے کہاکہ چیف جسٹس قاضی فائز عیسیٰ کہہ چکے ہیں کہ 8 فروری کو انتخابات پتھر پر لکیر ہے اور ہمیں اُن کی بات پر یقین ہے۔
چیئرمین پی پی پی نے کہاکہ ہم لیول پلیئنگ فیلڈ کا شکوہ نہیں کر رہے کیوں کہ عوام ہمارے ساتھ ہے، مسائل کا مقابلہ کرنے کے لیے پیپلزپارٹی کو موقع دینا چاہیے۔
مزید پڑھیں
انہوں نے کہاکہ تحریک انصاف والے اپنے قائد کو جیل سے نکالنے اور مسلم لیگ ن والے اپنے لیڈر کو جیل سے بچانے کے لیے انتخابات لڑ رہے ہیں۔
بلاول بھٹو نے کہاکہ پیپلزپارٹی کا 10 نکاتی ایجنڈا ہی ہمارا منشور ہے، ہماری تاریخ ہے کہ ہم انتخابات سے پہلے جو وعدے کرتے ہیں ان پر عملدرآمد کرتے ہیں، ’2008 کے انتخابات کے بعد پیپلزپارٹی نے 18ویں ترمیم اور بینظیر انکم اسپورٹ پروگرام‘ کا وعدہ پورا کر کے دکھایا‘۔
چیئرمین پی پی پی نے کہاکہ ایسے ظاہر کیا جا رہا ہے کہ لاہور میں دودھ اور شہد کی نہریں بہہ رہی ہیں حالانکہ اصل میں ایسا نہیں، ہم چاہتے ہیں کہ یہاں کے کسان، مزدور میں طالبعلم کے مسائل حل کریں۔
انہوں نے کہاکہ پیپلزپارٹی نے صوبوں کو این ایف سی ایوارڈ دیا لیکن مسلم لیگ ن نے ہمیشہ اشرافیہ کی نمائندگی کی ہے، پنجاب کے عام آدمی کا کوئی پرسان حال نہیں۔
پیپلزپارٹی کو پنجاب سے باہر کرنے کے لیے سازشیں کی گئیں
چیئرمین پی پی پی نے کہاکہ آج کہا جا رہا ہے کہ بہت زیادہ امیدواروں کے کاغذات مسترد ہو گئے ہیں مگر 2013 میں تو اس سے زیادہ لوگوں کے کاغذات مسترد ہوئے تھے۔
بلاول بھٹو نے کہاکہ پیپلزپارٹی کی بنیاد ہی لاہور میں رکھی گئی تھی اس لیے میں بھی اپنا سفر یہاں سے شروع کر رہا ہوں۔ ہمارا اس شہر کے ساتھ ایک رشتہ ہے، ذوالفقار علی بھٹو کو جب سزائے موت دی گئی تو یہاں کے لوگوں نے خود کو آگ لگا دی تھی۔
چیئرمین پی پی پی نے کہاکہ پنجاب سے پیپلزپارٹی کو آؤٹ کرنے کے لیے جنرل ضیا سمیت دیگر غیر سیاسی لوگوں نے مختلف لوگ ہم پر مسلط کیے۔ ہم اس الیکشن میں سلیکشن کا مقابلہ کریں گے۔
