عالمی مالیاتی فنڈ (آئی ایم ایف) نے پاکستان کے لیے قرضے کی اگلی قسط جاری کردی ہے اس طرح ملک کو 70 کروڑ ڈالر موصول ہوگئے جو بلاشبہ زرمبادلہ کے ذخیرے میں اضافے کا بھی باعث ہوگا۔
آئی ایم ایف کے ایگزیکٹیو بورڈ نے گزشتہ ہفتے اقتصادی جائزے کی منظوری دی تھی۔ اسٹیٹ بینک آف پاکستان کی جانب سے رقم موصول ہونے کی تصدیق کردی گئی ہے۔
اسٹیٹ بینک نے بتایا ہے کہ پاکستان کو جاری کردہ رقم 1.9 ارب ڈالر ہوگئی ہے اور آخری اقتصادی جائزے کے بعد پاکستان کو مزید 1.1 ارب ڈالر ملیں گے۔
عالمی مالیاتی ادارے سے 70 کروڑ ڈالر کی قسط 15 جنوری کو ملنی تھی تاہم مارٹن لوتھرکنگ جونیئر کی سالگرہ پر امریکا میں چھٹی کے باعث اس ٹرانسیکشن میں ایک دن کی تاخیر ہوگئی۔
پاکستان کو 70 کروڑ ڈالر اسٹیٹ بینک کے اکاؤنٹ نمبر 1 میں منتقل ہوں گے جس کے بعد ملک میں زرمبادلہ کے ذخائر 14 ارب ڈالر سے تجاوز کر جائیں گے۔
مزید پڑھیں
یاد رہے کہ آئی ایم ایف نے پاکستان کے لیے 70 کروڑ ڈالر کی دوسری قسط کی منظوری 11 جنوری کو دی تھی اور یہ کہا گیا تھا کہ پاکستان کو آئی ایم ایف سے 1.9 ارب ڈالر مل جائیں گے جس سے زرمبادلہ ذخائر 14 ارب ڈالر تک پہنچ جائیں گے۔
پاکستان کے لیے اسٹینڈ بائی ارینجمنٹ پروگرام کے تحت قرض کی منظوری دی گئی تھی۔ پہلے اقتصادی جائزے کی تکمیل پر اسٹاف لیول معاہدہ 15 نومبر 2023 کو طے پایا تھا۔
واضح رہے کہ پاکستان کو قرض پروگرام میں سے 1.2 ارب ڈالر پہلے ہی مل چکے ہیں۔
