ٹیکنالوجی شعبے میں خدمات کی برآمدات میں جاری مالی سال کے پہلے نصف میں سالانہ بنیادوں پر 9 فیصد کی نمو ریکارڈ کی گئی ہے۔
اسٹیٹ بینک کی جانب سے جاری کردہ اعدادوشمار کے مطابق جولائی سے دسمبر 2023 تک کی مدت میں ٹیکنالوجی شعبہ میں خدمات کی برآمدات کا حجم 1.455 ارب ڈالر ریکارڈ کیا گیا جو گزشتہ مالی سال کی اسی مدت کے مقابلے میں 9 فیصد زیادہ ہے۔ گزشتہ مالی سال کی اسی مدت میں اس شعبے کی برآمدات کا حجم 1.335 ارب ڈالر ریکارڈ کیا گیا تھا۔
دسمبر میں ٹیکنالوجی خدمات کی برآمدات سے ملک کو 303 ملین ڈالر کا زرمبادلہ حاصل ہوا جو دسمبر 2022 کے مقابلے میں 23 فیصد زیادہ ہے۔ دسمبر 2022 میں ٹیکنالوجی خدمات کی برآمدات سے ملک کو 247 ملین ڈالر کا زرمبادلہ حاصل ہوا تھا۔
مزید پڑھیں
نومبر کے مقابلے میں دسمبر میں ٹیکنالوجی خدمات کی برآمدات میں ماہانہ بنیادوں پر 17 فیصد کی نمو ہوئی ۔ نومبر میں ٹیکنالوجی خدمات کی برآمدات کا حجم 259 ملین ڈالر ریکارڈ کیا گیا جو دسمبر میں بڑھ کر 303 ملین ڈالر ہوگیا۔
واضح رہے کہ مالی سال کے پہلے 6 ماہ میں خدمات کی برآمدات کا مجموعی حجم 3.766 ارب ڈالر ریکارڈ کیا گیا ہے جو گزشتہ مالی سال کی اسی مدت کے مقابلے میں 3 فیصد کم ہے۔ گزشتہ مالی سال کی اسی مدت میں خدمات کی برآمدات سے ملک کو 3.870 ارب ڈالر کا زرمبادلہ حاصل ہوا تھا۔
