پاکستان تحریک انصاف (پی ٹی آئی) کے بانی عمران خان نے کہا ہے کہ معدت میں نکاح کا کیس مجھے ذلیل کرنے کے لیے بنایا گیا مگر میں نے کوئی ڈیل کی نہ کروں گا۔
اڈیالہ جیل میں عدت میں نکاح کے کیس میں فیصلہ سنائے جانے کے بعد صحافیوں سے غیررسمی گفتگو میں عمران خان نے کہاکہ مر جاؤں گا مگر ڈیل نہیں کروں گا، مجھے توشہ خانہ میں بھی وہ سزا سنائی گئی جو کسی کو بھی نہیں ہوئی۔
مزید پڑھیں
انہوں نے کہاکہ مجھ پر 200 کیسز بنائے گئے ہیں، آج تک پاکستان میں اتنے کیسز کسی کے خلاف نہیں بنے۔ نواز شریف کو سپریم کورٹ نے نااہل کیا، جے آئی ٹی بنی لیکن سب کیسز ختم کردیے گئے۔
عمران خان نے کہاکہ شہباز شریف کے خلاف ایف آئی اے کا مضبوط کیس تھا جسے ختم کیا گیا، الیکشن آیا تو ہمارے لوگوں کی گرفتاریاں شروع ہو گئیں۔
انہوں نے نوازشریف کا نام لیے بغیر تنقید کرتے ہوئے کہاکہ ایک شخص باہر سے آگیا ہے جو ان کی نوکری کرے گا۔
واضح رہے کہ اسلام آباد کی سول عدالت نے عمران خان بشریٰ بی بی کا عدت میں کیا گیا نکاح غیر شرعی قرار دیتے ہوئے دونوں کو 7،7 سال قید کی سزا سنا دی ہے۔
