پاکستان سپر لیگ (پی ایس ایل) سیزن 9 میں کئی کھلاڑیوں نے مختلف وجوہات کی بنا پر آخری لمحات میں ٹورنامنٹ سے باہر ہونے کا فیصلہ کیا ہے۔ ملتان سلطانز کے بعد کراچی کنگز اور لاہور قلندرز کو بھی پی ایس ایل 9 سے قبل اہم غیر ملکی کھلاڑیوں کی عدم دستیابی کا مسئلہ درپیش ہے۔ کراچی کنگز کو اپنے 2 اہم غیرملکی کھلاڑیوں تبریز شمسی اور جیمی اوورٹن کی محدود دستیابی کی وجہ سے بڑا دھچکا لگا ہے۔
مزید پڑھیں
جنوبی افریقی جوڑی تبریز شمسی اور راسی وان ڈیر ڈوسن پی ایس ایل سیزن کے پہلے نصف یعنی 6 میچوں کے لیے اپنی اپنی فرنچائزز کے لیے دستیاب ہوں گے۔ جنوبی افریقا کے کلائی اسپنر تبریز شمسی 6 مارچ کو ڈومیسٹک ٹی 20 مصروفیات کے باعث پی ایس ایل 9 ادھورا چھوڑ دیں گے۔ انگلش آل راؤنڈر جیمی اوورٹن کو ان کی کاؤنٹی سرے نے 5 اپریل سے شروع ہونے والی کاؤنٹی چیمپیئن شپ کی تیاریوں کو یقینی بنانے کے لیے پورے سیزن کے لیے واپس لے لیا ہے۔
کرکٹ ساؤتھ افریقا کی پالیسی سے لاہور قلندرز کے راسی وان ڈیر ڈوسن بھی متاثر ہوں گے جس کی وجہ سے انہیں 6 مارچ کو وطن واپس جانا پڑے گا جس سے سیزن کے آخری حصے پر اثر پڑے گا۔ انگلینڈ نے احتیاطی تدابیر اختیار کرتے ہوئے انگلش فاسٹ بولر ریس ٹاپلے کا این او سی واپس لے لیا ہے جو ملتان سلطانز کی نمائندگی کرنے والے تھے کیونکہ انہیں ایس اے 20 کے دوران معمولی چوٹ لگی تھی جس پر تشویش کا اظہار کیا گیا تھا۔ ذرائع کے مطابق ممکنہ طور پر ٹاپلے کا متبادل نندرے برگر، اولی اسٹون یا دشمنتھا چمیرا ہوں گے۔
