پاکستان مسلم لیگ (ن) کی سیکریٹری اطلاعات مریم اورنگزیب نے مسلم لیگ (ن) اور جے یو آئی(ف) سے متعلق میڈیا کی خبروں کی تردید کر دی۔
اپنے ایک بیان میں مریم اورنگزیب نے کہاکہ دونوں جماعتوں کے حوالے سے میڈیا میں آنے والی خبریں حقیقت پر مبنی نہیں۔
انہوں نے کہاکہ دونوں جماعتوں کے قائدین کے درمیان آج مشاورتی اجلاس ہوا جس کا باضابطہ اعلامیہ جاری کیا گیا۔ مولانا فضل الرحمٰن ہمارے لیے ایک بزرگ اور قابل احترام شخصیت ہیں۔
مزید پڑھیں
انہوں نے کہاکہ دونوں جماعتوں میں سیاسی تعاون اور باہمی احترام کا تعلق استوار ہے۔ میڈیا سے درخواست ہے کہ اجلاسوں کے حوالے سے قیاس آرائیاں نہ کرے۔
اعلامیہ کے مطابق شرکا نے خاص طور پر صوبہ بلوچستان کو درپیش چیلینجز کو مدنظر رکھتے ہوئے صوبہ میں ایک مضبوط جمہوری حکومت کو وقت کی ضرورت قرار دیا۔
اجلاس نے طے کیا کہ بلوچستان میں مختلف سیاسی قوتوں کا مل کر بیٹھنا ملکی مفاد میں ہے۔
اعلامیہ کے مطابق اس سلسلہ میں فریقین اپنی جماعتوں میں تعاون کے خواہاں ہیں۔
واضح رہے کہ میڈیا پر خبریں سامنے آئی تھیں کہ عبدالغفور حیدری کی جانب سے بلوچستان میں مل کر حکومت بنانے کی تجویز پر اسحاق ڈار نے ان کو جواب دیا کہ مولانا صاحب آپ نے بہت دیر کر دی۔
