غیر ملکی خبر رساں ادارے کے مطابق 26 سالہ اداکار ڈونی رولوِنک نے رواں ماہ 19 اپریل کو ایک مسجد میں اسلام قبول کیا ہے۔
سوشل میڈیا پر وائرل ویڈیو میں دیکھا جاسکتا ہے کہ اداکار ڈونی مقامی مسجد میں نمازیوں سے سامنے کلمہ طیبہ پڑھتے ہوئے دائرہ اسلام میں داخل ہوئے۔اسلام قبول کرنے کے بعد اداکار کا اپنی انسٹاگرام ویڈیو میں کہنا تھا کہ ،’مجھے نہیں لگتا کہ بہت سے لوگوں نے یہ دیکھا ہے کہ میرا کل ایک خاص دن تھا۔‘
انہوں نے کہا کہ ’اس لمحے کی تصاویر آن لائن پوسٹ کی گئیں اور اسے میڈیا میں بڑے پیمانے پر رپورٹ کیا گیا، جب میں لوگوں کے ایک بڑے گروپ کی موجودگی میں ایسا (اسلام قبول) کر رہا تھا۔‘
خیال رہے کہ 2022ء میں اداکار رولوِنگ ڈونی ایک فٹنس کی ویڈیو شوٹنگ کے دوران بری طرح زخمی ہو گئے تھے، ان کی پانچ پسلیاں ٹوٹی تھیں اور پھیپھڑے بھی متاثر ہوئے تھے، بعدازاں اسی سال ان میں کینسر کی بھی تشخیص سامنے آئی تھی۔
ان دونوں واقعات نے ڈونی پر گہرا اثر ڈالا اور انہوں نے مذہب سے متعلق تعلیمات کا آغاز کیا اور آخر کار اسلام سیکھ کر اسے بطور مذہب اپنا لیا۔ڈونی آج کل دبئی میں موجود ہیں، گزشتہ چند ہفتوں کے دوران ڈونی نے مسجدوں کا دورہ بھی کیا ہے جس کی ویڈیو وہ اپنے انسٹاگرام پر شیئر کر رہے ہیں۔
