ایف آئی اے سائبر کرائم سرکل اسلام آباد نے بڑی کارروائی کرتے ہوئے مالی فراڈ میں ملوث گینگ کے 3 ملزمان کو گرفتار کر لیا ہے ۔
ترجمان ایف آئی اے کے مطابق گرفتار کیے گئے ملزمان کا تعلق نائیجریا سے ہے جن میں اوبڈو اموبی، چائنیڈو اجازی اور ایگوہ چائینیسو شامل ہیں۔
ملزمان فیس بک کے ذریعے تحائف کا جھانسہ دے کر عام شہریوں سے رقم ہتھیاتے تھے اور خود کو بیرون ممالک کی خاتون شہری ظاہر کرتے ہوئے اپنے جال میں پھنساتے تھے۔
ملزمان سادہ لوح لوگوں کو تحائف کالالچ دے کر پھنساتےتھے
ترجمان ایف آئی اے نے بتایا کہ ملزمان پہلے سادہ لوگوں کو تحائف کا لالچ دے کر رابطہ کرتے تھے جس کے بعد کسٹم اور ڈیلیوری چارجز کے نام پر پیسے بٹورے جاتے تھے۔
انہوں نے بتایا کہ ملزمان نے شکایات کنندہ سے 2 لاکھ 55 ہزار روپے ہتھیائے اور رقم مختلف بینک اکاؤنٹس کے ذریعے منگوائی گئی اور ابھی تحائف کی وصولی کے لیے مزید 3 لاکھ روپے کا تقاضا کیا جارہا تھا۔
ایف آئی اے ترجمان نے مزید بتایا کہ ملزمان کے قبضے سے 8 موبائل فونز برآمد کرلیے گئے ہیں اور ان کے خلاف پیکا ایکٹ کے تحت مقدمہ درج کرکے تفتیش شروع کردی ہے۔
